ლომჯარია: კონტრაქციები და ძალადობრივი დაპირისპირება ქვეყანას ღრმა კრიზისში შეიყვანს

„კონტრაქციები და თუნდაც სამართალდამცველების ჩართულობით აქციების დაშლა შექმნილი ვითარებიდან არ არის გამოსავალი. ასეთი დამოკიდებულება და ძალადობრივი დაპირისპირებები კიდევ უფრო ღრმა კრიზისში შეიყვანს ქვეყანას“, - ეს განცახდება სახალხო დამცველმა ნინო ლომჯარიამ მედიასთან გააკეთა. 

„ვფიქრობ, რომ ერთადერთი გამოსავალი არის კონსენსუსი პოლიტიკურ პარტიებსა და საზოგადოებას შორის. ამ ეტაპზე კონსენსუსი მდგომარეობს იმაში, რომ აუცილებლად უნდა ვიფიქროთ, როგორ გადავიდეთ პროპორციულ საარჩევნო სისტემაზე რაც საარჩევნო პროცესს უფრო სამართლიანს გახდის“, - განაცხადა ნინო ლომჯარიამ.

სახალხო დამცველმა აქციების დროს პოლიციელების ქმედებებიც შეაფასა:

„ჩვენ ვხედავთ არა მარტო ამ აქციებზე, არამედ მთელი წლის განმავლობაში რიგ შემთხვევებში პოლიციის ქმედება არ იყო ეფექტური კონტრდემონსტრანტების მიმართ, რომლებიც იყვნენ აგრესიულები და ემუქრებოდნენ მშვიდობიან მოქალაქეებს, რომლებიც აქციებს სხვადასხვა საკითხზე მართავდნენ. სახალხო დამცველი ყველა დაშავებულთან საუბრობს. თუ შესწავლის შედეგად დავინახავთ, რომ პოლიციელთა მხრიდან იყო უმოქმედობა და არასათანადო რეაქცია, რა თქმა უნდა, გამოვიყენებთ შესაბამისი რეაგირების ზომებს“, - განაცხადა ნინო ლომჯარიამ. 

ბოლო დღეებში ოპოზიციის და „ქართული ოცნების“ მომხრეებს შორის დაპირისპირება გამწვავდა. 3 დეკემბერს ზუგდიდში "ნაციონალური მოძრაობის" ოფისთან გამართულ აქციაზე, სამართალდამცველი დაშავდა.

გუშინ დაპირისპირება და ხმაური იყო ქობულეთში, ქუთაისსა და მცხეთაში. ქობულეთის მერიაში ერთმანეთს ქალაქის მერი მირიან ქათამაძე და „ნაციონალური მოძრაობის“ დეპუტატი უმაღლეს საბჭოში, ელგუჯა ბაგრატიონი დაუპირისპირდნენ. 

ქუთაისში ხმაური და სიტყვიერი დაპირისპირება აკაკი ბობოხიძის გამოჩენას მოჰყვა. „ქართული ოცნების“ მხარდამჭერებმა მასთან პირისპირ შეხვედრა მოითხოვეს. დაპირისპირება მოხდა მცხეთაში, დეპუტატ დიმიტრი ხუნდაძის ბიუროსთანაც, სადაც „ქართული ოცნების“ მხარდამჭერებმა გიგა ბოკერიას წყალი შეასხეს.

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა. 

14 ნოემბრის შემდეგ თბილისსა და სხვა ქალაქებში საპროტესტო აქციები და საჯარო უწყებების "დაბოქლომება" დაიწყეს ოპოზიციამ და საზოგადოებრივი მოძრაობის წევრებმა. თუმცა ბოლო დღეების განმავლობაში რეგიონებში აქციები ოპოზიციის, კერძოდ კი "ნაციონალური მოძრაობის" წინააღმდეგაც იმართება. კონტრაქციის მონაწილეები "ნაცმოძრაობას" აპროტესტებენ და სკანდირებენ "არა მიშა"-ს. 

„ქართული ოცნებისა“ და ოპოზიციური პარტიების წარმომადგენლების შეხვედრა სასტუმრო „ბილტმორში“ 30 ნოემბერს გაიმართა. მას დიპლომატიური მისიების წარმომადგენლებიც ესწრებოდნენ. მხარეებმა მიმდინარე პოლიტიკური საკითხები განიხილეს. 

პროპორციულ საარჩევნო სისტემაზე გადასვლის შესახებ საკონსტიტუციო ცვლილებების პროექტის ჩავარდნის შემდეგ ოპოზიცია პარლამენტთან და სხვა საჯარო უწყებებთან საპროტესტო აქციებს მართავს. ოპოზიცია არჩევნების „გერმანული მოდელით“ ჩატარებას ითხოვს, რისთვისაც სპეციალური კანონპროექტი შეიმუშავა.