იოსებ გოგაშვილი: აჰმედ ჩატაევის ჯგუფი სააკაშვილის და მერაბიშვილის დავალებით შეიქმნა

ტერიორისტულ ორგანიზაციებთან „ნაციონალური მოძრაობის“ კავშირის შესახებ იოსებ გოგაშვილის მიერ გუშინ გაკეთებული სკანდალური განცხადების შემდეგ, სუსის ყოფილი მაღალჩინოსანი, „ქრონიკას“ პირველ სატელევიზიო ინტერვიუს აძლევს.

ექსკლუზიურ მასალაში გოგაშვილი დეტალებზე საუბრობს და რამდენიმე გვარსაც ასახელებს, მათ შორის არის მიხეილ სააკაშვილი და ვანო მერაბიშვილი. 

იოსებ გოგაშვილი ამბობს, რომ მიხეილ სააკაშვილისა და ვანო მერაბიშვილის უშუალო ჩართულობითა და ხელმძღვანელობით შექმნილი იყო დაჯგუფება, რომლის წევრებიც ტერორისტები იყვნენ, რომელსაც აჰმედ ჩატაევი ხელმძღვანელობდა. ამ დაჯგუფებას კი „ნაციონალური მოძრაობის“ ყოფილი ლიდერები პოლიტიკური მიზნებისთვის იყენებდნენ. 

იოსებ გოგაშვილი აცხადებს, რომ ამის დადასტურება შეუძლია როგორც მტკიცებულებებით, ასევე მოწმეებით. გოგაშვილი მზად არის ეს დოკუმენტები გენერალურ პროკურატურას გადასცეს, თუმცა როდის მოხდება ეს, ჯერ უცნობია.

„ვგულისხმობდი იმას რაც რეალურად ხდებოდა, ხდება - მათ კავშირს „ისლამური სახელმწიფოს“ წევრებთან. დადგა დრო, რომ ქართველმა ხალხმა სიმართლე უნდა იცოდეს იმ მიზნების განსახორციელებლად რასაც ხელისუფლებაში დაბრუნება ჰქვია, რა მეთოდებს მიმართავს „ნაციონალური მოძრაობა“, კონკრეტულად მისი ლიდერები, შემდეგ უკვე არიან შემსრულებლები... მინდა ვამცნო საზოგადოებას ამის უკან რა დგას - ტერორისტებთან კავშირი და კონკრეტულად მათი გაქცეული ლიდერი, ყოფილი პრეზიდენტი და ახლა რომ გამოდის კიდევ და გმირად რომ ამზადებენ - შინაგან საქმეთა ყოფილი მინისტრი [ვანო მერაბიშვილი]. 

რა თქმა უნდა, დოკუმენტებიც იქნება. ადამიანებიც იქნებიან, რომლებიც ისაუბრებენ... დადასტურებადია, იმიტომ რომ მაქვს პასუხისმგებლობა როგორც მოქალაქეს, როგორც ყოფილ მაღალჩინოსანს, მე არ ვთამაშობ, იმედია ხალხი მიხვდება რომ ჩემგან ამ სიტყვების გაჟღერება და ინფორმაციის დაანონსება, რომ შემიძლია ასეთი ინფორმაცია გავასაჯაროვო, არ არის თამაში და პიარ ნაბიჯები...

სხვადასხვა დოზით იყვნენ ჩართულები ადამიანები. მაგალითად იყვნენ ის კატეგორია, რომელიც დავალებას იღებდა. რა თქმა უნდა, დავალების შესაფუთი მასალა იყო სახელმწიფოებრივი ინტერესები...

მას ჰქონდა პოლიტიკური მიზნებისთვის ეს - როცა დასჭირდებოდა კონკრეტულად რაღაც მოქმედების განხორციელება, ის ამას განახორციელებდა. ეს იყო შექმნილი არაფორმალური დაჯგუფება, რომელიც დაკომპლექტებული იყო ტერორისტებისგან. ნაწილი გარდაცვლილია მათი, ნაწილის ლიკვიდაცია თვითონ მოახდინეს, ნაწილიც გასულია ქვეყნიდან. ერთ-ერთი მთავარი ფიგურა იყო ჩატაევი. ჩატაევს კონკრეტულად სააკაშვილისგან და მერაბიშვილისგან დაევალა ამ ჯგუფის შეკრება და იმანაც ეს ჯგუფი შეკრიბა. ძალოვან უწყებებში ამის შესახებ აქვთ ინფორმაცია ბერს და მინდა ერთხელ და სამუდამოდ ამას ფარდა აეხადოს და დაერქვას სახელი რა იდგა აჰმედ ჩატაევის მაშინდელი ჩამოყვანისა და 2017 წლის შემოსვლის უკან“, - განაცხადა იოსებ გოგაშვილმა. 

მალხაზ მაჩალიკაშვილმა განაცხადა, რომ პანკისის ხეობაში ჩატარებული სპეცოპერაციის შემდეგ მას ჩხრეკის ოქმზე ხელი არ მოუწერია. 

28 იანვარს თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება შეწყვიტა. იმავე დღეს იოსებ გოგაშვილმა განაცხადა, რომ დუმილის დარღვევის დრო დადგა და „ნაციონალური მოძრაობა“ „ისლამური სახელმწიფოს“ ტერორისტებთან თანამშრომლობაში დაადანაშაულა. 

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.