როდის, როგორ და რამდენჯერ გადაკვეთა საქართველოს საზღვარი აჰმედ ჩატაევმა

გასულ კვირაში სახელმწიფო უსაფრთხოების სამსახურის უფროსის ყოფილმა მოადგილემ იოსებ გოგაშვილმა განაცხადა, რომ ბერი გაბრიელ სალოსის ქუჩაზე მოკლულ აჰმედ ჩატაევს ხელისუფლებაში ყოფნის დროს, მიხეილ სააკაშვილი და ვანო მერაბიშვილი პოლიტიკური მიზნებისთვის იყენებდნენ, მათ შორის აჰმედ ჩატაევი მაშინდელმა ხელისუფლებამ მოლაპარაკებებისთვის ჩამოიყვანა ლაფანყურის სპეცოპერაციის დროს. როგორ, ვისი დახმარებით და რომელ წლებში კვეთდა აჰმედ ჩატაევი საქართველოს საზღვარს. ამასთან დაკავშირებით სიუჟეტი „იმედის კვირამ“ მოამზადა. 

ჩატაევის საქართველოში შემოყვანის ვერსიას „იმედის კვირის“ მიერ ერთი წლის წინ მოპოვებული მტკიცებულებებიც ამყარებს. საქმის მასალებით დგინდება, რომ 2010 წელს ინტერპოლის მიერ ძებნილი ტერორისტის უკრაინიდან საქართველოში ექსტრადირებისთვის შსს-მ საქმის გაყალბება გადაწყვიტა. თბილისის მთავარ სამმართველოში გახსნილად გამოაცხადეს 2003 წელს ხახანაშვილის ქუჩაზე მომხდარი 21 წლის შოთა დადვაძის მკვლელობა და ბრალი ჩატაევს წაუყენეს, რაც საქართველოში მისი ექსტრადირების მოთხოვნის საფუძველი გახდა.  

ცრუ მოწმეების ჩვენების საფუძველზე, ჩატაევი საქართველოში მოთხოვნიდან ორ თვეში თბილისის საერთაშორისო აეროპორტში 2010 წლის 28 თებერვალს ჩამოიყვანეს, ტერორისტი, რომლის გადმოცემაც საქართველომ უკრაინას მკვლელობის გამო მოსთხოვა, 2011 წლის 1 მაისს  თბილისის აეროპორტიდან თურქეთში გაუშვეს. 

2012 წლის იანვარსა და თებერვალში აჰმედ ჩატაევის სახელზე რეგისტრირებული პასპორტით მან საქართველოს სახელმწიფო საზღვარი თურქეთიდან კიდევ ორჯერ გადმოკვეთა, 2017 წლის იანვარში კი საქართველო რუსლან ისმაილოვის სახელზე რეგისტრირებული საქართველოს მოქალაქის პასპორტით დატოვა.

ამავე წლის იანვარსა და თებერვალში ჩატაევმა საქართველოს საზღვარზე 6-ჯერ ორი სხვადასხვა დოკუმენტით ისარგებლა. მარტში კი მის სახელზე კიდევ ერთი პასპორტი ჩნდება და ის თურქეთიდან დევიდ მეიერის სახელით ჩამოფრინდა. ამ პასპორტით ჩატაევმა საქართველოს სახელმწიფო საზღვარი 2012 წელს 9-ჯერ გადაკვეთა, მათ შორის ბოლოს ლაფანყურის სპეცოპერაციამდე 10 დრით ადრე, ქვეყანაში სარფის საბაჟოს გავლით დაბრუნდა. 

შსს-ს მაშინდელი ოფიციალური ინფორმაციით, ის ლაფანყურში დაჯგუფებასთან მოლაპარაკებებისთვის გამოიყენეს. საეჭვო იყო ისიც, რომ სპეცოპერაციისას დაჭრილი ჩატაევი იარაღის უკანონო ტარებისთვის დააკავეს, მოგვიანებით კი მესაზღვრეებმა, სასამართლოს განუცხადეს, რომ ჩატაევს იარაღი თავად ჩაუდეს. სწორედ ეს გახდა მის მიმართ 2013 წელს დევნის შეწყვეტის მიზეზი.

საქართველოსა და აშშ-ს ამხანაგური შეხვედრა რაგბში, საბავშვო ევროვიზია და აბრეშუმის გზის ფორუმი. სამი მასშტაბური ღონისძიება ტარდებოდა საქართველოში სწორედ იმ პერიოდში, როდესაც აჰმედ ჩტაევი ტერაქტებს გეგმავდა. ჩანაწერებიდანაც ირკვევა, რომ მისი სამიზნე ხალხმრავალი ადგილები და დიპლომატიური უწყებები უნდა ყოფილიყო.

აჰმედ ჩატაევი საქათველოს ტერაქტების სერიით, ჯერ კიდევ 2015 წელს დაემუქრა, მას შემდეგ, რაც კონტრტერორისტულმა ცენტრმა აიუფ ბორჩაშვილი დააკავა - იმამი, რომელიც ჩატაევის მთავარი მოკავშირე იყო და ისლამური სახელმწიფოს რიგებში საბრძოლველად საქართველოდან ახალგაზრდები მიჰყავდა.

ჩატაევი მის გათავისუფლებას და თურქეთის ტერიტორიაზე გადაყვანას ითხოვდა, წინააღმდეგ შემთხვევაში ტერაქტებს აანონსებდა. ეს არ იყო პირველი შემთხვევა, როცა საქართველოდან სირიაში წასული ISIS-ის მებრძოლები, საქართველოში მყოფ თანამოაზრეებს კონკრეტულ დავალებებს აძლევდნენ.

საფრთხე რომ რეალური იყო, ეს სახელმწიფო უსაფრთხოების სამსახურმა ბოლო წლებში მიღებული ინფორმაციისა და გატარებული ღონისძიებების შეფასებით უკვე კარგად იცოდა. სწორედ ამიტომ, პანკისის ხეობასა და თბილისში დაიგეგმა დაკავების ოპერაცია, უსაფრთხოების სამსახურს ჩატაევის მოკავშირეები ცოცხლები და ინფორმაციის მიმწოდებელი სჭირდებოდათ, თუმცა, დავალებაზე გასულმა სპეცრაზმელებმა სალოსის ქუჩის გამოცდილებით, კარგად იცოდნენ, რომ წინააღმდეგობაც მოსალოდნელი იყო.

28 იანვარს თემირლან მაჩალიკაშვილის მიმართ ძალადობით სამსახურებრივი უფლებამოსილების შესაძლო გადამეტების ფაქტზე პროკურატურამ გამოძიება შეწყვიტა. იმავე დღეს იოსებ გოგაშვილმა განაცხადა, რომ დუმილის დარღვევის დრო დადგა და „ნაციონალური მოძრაობა“ „ისლამური სახელმწიფოს“ ტერორისტებთან თანამშრომლობაში დაადანაშაულა. 

2017 წელს ბერი გაბრიელ სალოსის ქუჩაზე ანტიტერორისტული სპეცოპერაციის შედეგად დააკავეს ერთი ადამიანი - შუაიფ ბორზიევი, ხოლო წინააღმდეგობის გაწევისას დაიღუპა სამი ადამიანი, მათ შორის ერთი აჰმედ ჩატაევია. 

ამ სპეცოპერაციიდან თითქმის 1 თვეში, სახელმწიფო უსაფრთხოების სამსახურმა მეორე სპეცოპერაცია ამჯერად პანკისის ხეობაში ჩაატარა, რა დროსაც 19 წლის თემირლან მაჩალიკაშვილი დაიჭრა, რამდენიმე პირი კი დააკავეს. თემირლან მაჩალიკაშვილი საავადმყოფოში 2018 წლის 10 იანვარს გარდაიცვალა.  

სუსი აცხადებდა, რომ დეკემბრის სპეცოპერაციისას დაკავებული ადამიანები, 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმა საქართველოში მომუშავე დიპლომატიურ კორპუსებზე. მაშინ სახელმწიფო უსაფრთხოების სამსახურმა აჰმედ ჩატაევსა და თემირლან მაჩალიკაშვილის კავშირზე მასალა გამოაქვეყნა, რომელშიც ჩანს თუ როგორ გადაადგილდებიან თბილისში აჰმედ ჩატაევის დაჯგუფების წევრები შოაიფ ბორზიევი და ასლანბეგ სოლტახმატოვი თემირლან მაჩალიკაშვილთან ერთად. 

თემირლან მაჩალიკაშვილის მშობლებს და პანკისის უხუცესებს აჰმედ ჩატაევთან და ტერორისტებთან მაჩალიკაშვილის კავშირს არ სჯერათ.