კობახიძე: ხელისუფლება რუსული დელეგაციის ვიზიტის შესახებ გადაწყვეტილებას ევროსაბჭოსთან კონსულტაციების შემდეგ მიიღებს

საქართველო, უკრაინა და ბალტიისპირეთის ქვეყნები რუსეთის დელეგაციის ევროსაბჭოში დაბრუნებას მჭიდრო თანამშრომლობით აპროტესტებდნენ, - ამის შესახებ „შაბათის ქრონიკაში“ „ქართული ოცნების“ ერთ-ერთმა ლიდერმა ირაკლი კობახიძემ განაცხადა. 

მისი თქმით, რუსული დელეგაციის დაბრუნების მოლოდინის არსებობის მიუხედავად, დისკუსიამ ამ ქვეყნების დელეგაციებს თავისი გზავნილების კიდევ ერთხელ გაჟღერების საშუალება მისცა. 

„ჩვენ აქტიურად ვსაუბრობდით საპარლამენტო ასამბლეის სესიაზე ჩვენს პრობლემაზე, აფხაზეთისა და ცხინვალის რეგიონის ოკუპაციის პრობლემაზე, ასევე ჩვენ და უკრაინელი და ბალტიისპირელი კოლეგები ვსაუბრობდით ყირიმის ანექსიის პრობლემაზე და იმ პრობლემაზე, რომელიც დონეცკისა და ლუგანსკის ოლქებში არის შექმნილი. გვქონდა ძალიან მჭიდრო თანამშრომლობა და აუცილებლად, ძალიან აქტიურად დაისმება მომავალში რუსეთის საკითხი საპარალამენტო ასამბლეის სხდომაზე. აქ ვიქნებით ჩვენ ძალიან პრინციპულები. რუსული დელეგაციის დაბრუნება ევროპის საბჭოში არ უნდა ნიშნავდეს იმას, რომ ევროპის საბჭო, თვალებს ხუჭავს იმ პრობლემაზე, რომლის გამოც რუსეთის ფედერაციას წევრობის უფლება შეუჩერდა. მაშინ ამის მიზეზი გახდა ყირიმის ანექსია“, - აღნიშნა კობახიძემ.

კობახიძემ თბილისში რუსული დელეგაციის შესაძლო ვიზიტზე და სალომე ზურაბიშვილის განცხადებაზეც ისაუბრა. მისი თქმით, მინესტერიალის ფარგლებში რუსი დეპუტატების საქართველოში სტუმრობის საკითხზე გადაწყვეტილებას თბილისი ევროპელ პარტნიორებთან კონსულტაციების შემდეგ მიიღებს.

„პრეზიდენტს როგორც ასეთი განცხადება მოწვევის თაობაზე არ გაუკეთებია. არის დღის წესრიგში შესაბამისი ღონისძიება - ეს არის მინისტრთა კომიტეტი, რომელიც უნდა გაიმართოს იმ ქვეყანაში, რომელიც პრეზიდენტი ქვეყნის სტატუსით სარგებლობს. გადაწყვეტილება, საბოლოო ჯამში, მიიღება კონსულტაციების საფუძველზე, იმ კონტექსტის გათვალისწინებით, მან გასცა რუსი დელეგატის კითხვას, შედარებით ზოგადი პასუხი. რაც შეეხება საბოლოო ჯამში გადაწყვეტილებას იმის თაობაზე თუ ვინ ჩამოვა თბილისში და ვინ არა, ამაზე გადაწყვეტილება მიიღება ორ მხარეს შორის კონსულტაციის თაობაზე. ერთ მხარეს არის საქართველოს მთავრობა, პირველ რიგში საგარეო საქმეთა სამინისტროს სახით, მეორე მხარეს კი ევროპის საბჭო“, - განაცხადა კობახიძემ.

მან 2016 წელს თბილისში ჩატარებული ეუთოს საპარლამენტო ასამბლეის სხდომაც გაიხსენა, რომელშიც 3 რუსი დეპუტატი მონაწილებდა, ვისაც საქართველოს კანონი ოკუპირებული ტერიტორიების შესახებ დარღვეული ჰქონდათ. 

„გახსოვთ, რომ 2016 წელს იმართებოდა თბილისში ეუთოს საპარლამენტო ასამბლეა და მაშინაც დადგა რუსული დელეგაციის მონაწილეობის საკითხი. „ნაციონალური მოძრაობა“ იყო აქტიური მხარდამჭერი იმისა, რომ თბილისში ჩატარებულიყო ეს ღონისძიება რუსი დელეგატების მონაწილეობით და ამ რუსი დელეგატებიდან 3 იყო ისეთი, რომელსაც დარღვეული ჰქონდა ოკუპირებული ტერიტორიების კანონი. მაშინ „ნაციონალურმა მოძრაობამ“ თვალი დახუჭა ოკუპაციის შესახებ კანონის დარღვევაზე და დღეს ზუსტად იგივე ადამიანები სპეკულირებენ ამ თემით“, - განაცხადა კობახიძემ.