ლუკ კოფი: შავი ზღვა აშშ-ის და ნატოს პრიორიტეტი უნდა იყოს

Heritage Foundation-ის ანალიტიკოსი ლუკ კოფი მიიჩნევს, რომ ნატოს და აშშ-ის პრიორიტეტი შავი ზღვა უნდა გახდეს. ამის შესახებ ის Middle East Institut-ზე გამოქვეყნებულ სტატიაში წერს. 

ანალიტიკოსის თქმით, შავი ზღვა ევროპას, აზიასა და შუა აღმოსავლეთ შორის გადაკვეთას წარმოადგენს და მნიშვნელოვანია ათასობით მილის მანძილზე მდებარე ქვეყნისთვისაც კი, როგორიც შეერთებული შტატებია. ამას კოფი ორი მიზეზით ხსნის.

„პირველი მიზეზი აშშ-ის, როგორც ნატოს წევრის ვალდებულებებია. შავი ზღვის ექვსი ქვეყნიდან სამი (თურქეთი, ბულგარეთი და რუმინეთი) ნატოს წევრია. კიდევ ორი ქვეყანა (უკრაინა და საქართველო) ნატოს პროგრამაში „პარტნიორობა მშვიდობისთვის“ მონაწილეობს, საქართველო კი ნატოს წევრობის კანდიდატია“, - წერს ანალიტიკოსი. 

მეორე მიზეზად კოფი შავ ზღვაზე რუსეთის დამოკიდებულებას ასახელებს და აღნიშნავს, რომ რეგიონში მოსკოვის დომინირება ქვეყნისთვის ეროვნული გადარჩენის საკითხია. ის ხაზგასმით აღნიშნავს, რომ რუსეთი შავ ზღვაზე ძირითადად ყირიმის უკანონო ოკუპაციის ხარჯზეა წარმოდგენილი და ანექსიის ფაქტს 21-ე საუკუნეში აგრესიის უპრეცედენტო შემთხვევას უწოდებს. 

კოფი წერს, რომ ყირიმზე კონტროლის დამყარების შემდეგ რუსეთი შავ ზღვას სირიის პრეზიდენტის ბაშარ ასადის მხარდამჭერი ოპერაციებისთვის იყენებს. 

„აღსანიშნავია, რომ ყირიმი შავი ზღვის სანაპიროზე რუსეთის მიერ ოკუპირებული ერთადერთი რეგიონი არ არის. 2008 წელს, რუსეთის საქართველოში შეჭრის შემდეგ მოსკოვს დიდი სამხედრო წარმომადგენლობა აქვს საქართველოს რეგიონ აფხაზეთში - დაახლოებით 4 ათასი სამხედრო - რომელიც შავი ზღვის სანაპიროს ასობით მილზეა განლაგებული“, - წერია სტატიაში. 

კოფი აშშ-ს და ნატოს რეგიონში თავიანთი პოლიტიკური, ეკონომიკური და უსაფრთხოების ინტერესების უზრუნველყოფისთვის რამდენიმე რეკომენდაციას აძლევს და ყურადღებას ნატოს შავი ზღვის სტრატეგიის, და საზღვაო პატრულის შექმნის სარგებლობაზე ამახვილებს. 

„შავი ზღვა ნატოსთვის ძალიან მნიშვნელოვანი რეგიონია და აქამდე სათანადო ყურადღებას არ იღებდა. ნატოს ცალკეული სტრატეგია და შავი ზღვის ქვეყნების მხარდაჭერა იმის გზავნილი იქნება, რომ ალიანსი ამ რეგიონს სერიოზულად აღიქვამს“, - წერს ლუკ კოფი. 

რამდენიმე დღის წინ ექსპერტმა სხვა სტატიაც გამოაქვეყნა, რომელშიც წერდა, რომ ნატომ თურქეთის რჩევა უნდა გაითვალისწინოს და საქართველო ორგანიზაციის რიგებში მიიღოს.