ლუკ კოფი: ნატომ თურქეთის რჩევა უნდა გაითვალისწინოს და საქართველო ალიანსში მიიღოს

Heritage Foundation-ის ანალიტიკოსი ლუკ კოფი აცხადებს, რომ ნატომ თურქეთის რჩევა უნდა გაითვალისწინოს და საქართველო ორგანიზაციის რიგებში მიიღოს. 

თურქულ გამოცემა TRT World-ში გამოქვეყნებულ სტატიაში ლუკ კოფი იხსენებს თურქეთის საგარეო საქმეთა მინისტრის, მევლუთ ჩავუშოღლუს განცხადებას, რომელმაც თქვა, რომ არ ესმოდა, თუ რატომ არ მიიღეს საქართველო ნატოში.

„ჩვენ, თურქეთს, გვაკრიტიკებენ მეზობელ რუსეთთან შედარებით კარგი ურთიერთობების დამყარების გამო, მაგრამ ჩვენი დასავლელი მეგობრები ვერ თანხმდებიან საქართველოს ნატოში გაწევრიანებაზე, ვინაიდან რუსეთის გაღიზიანება არ სურთ. თუმცა, ჩვენ ვჭირდებით საქართველოს და ჩვენც გვჭირდება საქართველოსნაირი მოკავშირე. შესაბამისად, ალიანსის გაფართოება აუცილებელია, საქართველო ნატოს წევრი უნდა გახდეს“, - განაცხადა ჩავუშოღლუმ.

ლუკ კოფის თქმით, ძალიან ცოტა ევროპულ ქვეყანას გამოუხატავს ნატოს მიმართ ისეთი ენთუზიაზმი, როგორც საქართველოს, რომელიც ალიანსის წევრიც კი არაა. 

„საქართველო 10 წელიწადზე მეტია, ალიანსში გაწევრიანებას ცდილობს. პირველად ქვეყანამ ალიანსში მიღების პირობა 2008 წელს, ბუქარესტის სამიტზე მიიღო. მას შემდეგ ეს დაპირება ყოველ სამიტზე მეორდებოდა. 2016 წლის დეკემბერში ნატოს გენმდივანმა იენს სტოლტენბერგმა განაცხადა, რომ საქართველოს ნატოში გასაწევრიანებლად ყველა პრაქტიკული ინსტრუმენტი აქვს. იმედგაცრუების განცდას ქართველებში სწორედ წევრობის მიღების გაჭიანურება ქმნის. შესაბამისად, ჩავუშოღლუ მართალი იყო, როდესაც თქვა, რომ ალიანსს საქართველოსნაირი მოკავშირე სჭირდება“, - წერს ლუკ კოფი.

მისივე თქმით, საქართველო ნატოს სანდო პარტნიორია და ეს არაერთხელ დაუმტკიცებია.

„2012 წელს, როდესაც ნატოს არაერთი ქვეყანა ავღანეთიდან წასვლაზე ფიქრობდა, საქართველომ თავისი მისია ასობით ჯარისკაცით გაზარდა. რაც შეეხება ავღანეთში საქართველოს სამხედრო წარმომადგენლობას, მსოფლიოს ერთ-ერთ ყველაზე საშიშ წერტილებში, ჰელმანდისა ​და ყანდაარის პროვინციებში საქართველოს 2000-ზე მეტი სამხედრო ჰყავდა გაგზავნილი. დღეს ეს რიცხვი 900 ჯარისკაცს შეადგენს, რაც საქართველოს ნატოს არაწევრ ქვეყნებს შორის ყველაზე მსხვილ კონტრიბუტორად აქცევს. 

გარდა ამისა, საქართველო სტრატეგიულად მნიშვნელოვან გეოგრაფიულ და კულტურულ გზაჯვარედინზე მდებარეობს და ნატო მის ტერიტორიას, ინფრასტრუქტურასა და ლოგისტიკურ შესაძლებლობებს ავღანეთში ძალებისა და ტვირთის გადაზიდვისთვის იყენებს. წლების განმავლობაში საქართველო აახლებდა თავის აეროპორტებსა და პორტებს. შავი ზღვის რეგიონისთვის ეს განსაკუთრებით მნიშვნელოვანია. ბაქო-თბილისი-ჯეიჰანის მილსადენი, ბაქო-სუფსის მილსადენი, სამხრეთის გაზის დერეფანი და ბაქო-თბილისი-ყარსის რკინიგზა საქართველოს ტერიტორიაზე გადის“, - წერს Heritage Foundation-ის ანალიტიკოსი.

ლუკ კოფი ასევე აღნიშნავს, რომ საქართველო დემოკრატიის კუთხით რეგიონისთვის მაგალითს წარმოადგენს.

„რეგიონული სტაბილურობის შენარჩუნებისთვის, აშშ დაინტერესებული უნდა იყოს იმით, რომ საქართველომ ეს კურსი შეინარჩუნოს. წლების განმავლობაში საქართველოს მთავრობა ეკონომიკის ლიბერალიზაციაზე, ბიუროკრატიის შემცირებაზე, კორუფციასთან ბრძოლაზე და დემოკრატიის განმტკიცებაზეა ორიენტირებული. 2003 წელს მომხდარი „ვარდების რევოლუციის“ შემდეგ საქართველო მტკიცედ უჭერს მხარს ტრანსატლანტიკურ თანამეგობრობას.

როდესაც საქართველოს ნატოში მიღებაზე დგება საუბარი, ალიანსის ზოგიერთი წევრი ქვეყანა იმაზე წუხს, რომ საქართველოს ტერიტორიის 20% რუსეთის მიერ არის ოკუპირებული. მოსკოვი კარგად იყენებს ამ საკითხს, რათა საქართველო ჩრდილოატლანტიკური ალიანსის წევრი არ გახდეს. რუსეთის ხელში ეს არის ერთგვარი დე ფაქტო ვეტო, რაც უბრალოდ მიუღებელია.

საბედნიეროდ, არსებობს საქართველოს ნატოში მიღების რამდენიმე ისეთი გზა, რომელიც რუსეთთან ომს არ გამოიწვევს. ერთადერთი კითხვა, რომელსაც ახლა პასუხი უნდა გაეცეს, უკავშირდება იმას, გამოიჩენენ თუ არა ატლანტის ოკეანის ორივე მხარეს მყოფი ლიდერები პოლიტიკურ ნებას, რომელიც საქართველოს ნატოში გასაწევრიანებლად არის საჭირო“, - აღნიშნავს ლუკ კოფი და დასძენს, რომ დროა, ალიანსმა წინ წაწიოს საქართველოს წევრობის საკითხი, გაითვალისწინოს თურქეთის საგარეო საქმეთა მინისტრის რჩევა და საქართველო ნატოში მიიღოს.