გიგა ბოკერია: დღევანდელ სისტემაშიც დამარცხდებიან, ოღონდ ეს არ იქნება ნორმალური სცენარი

„2020 წლის საპარლამენტო არჩევნებზე „ქართული ოცნება“ პირველი ვერც ერთ შემთხვევაში ვეღარ იქნება, რადგან ივანიშვილის გუნდი ვერც ერთი სისტემით ვეღარ მოიგებს, მომავალში არც ერთ პარტიას არ უნდა ჰქონდეს შესაძლებლობა, რომ უმრავლესობა მოიპოვოს “, - ეს განცხადება „ევროპული საქართველოს“ ერთ-ერთმა ლიდერმა გიგა ბოკერიამ „ლეიბორისტული პარტიის“ ოფისში შეხვედრის დაწყებამდე გააკეთა. 

„ჩვენ სწორედ ამ საკითხზე მსჯელობისთვის ვართ შეკრებილები. „ევროპული საქართველოს“ და მთელი ოპოზიციის მიდგომა დიდი ხანია ცნობილია. ჩვენ ვართ მოქნილები, მაგრამ არა საზოგადოებრივი ინტერესის ხარჯზე. 2020 წლის საპარლამენტო არჩევნებზე „ქართული ოცნება“ პირველი ვერც ერთ შემთხვევაში ვეღარ იქნება, რადგან ივანიშვილის გუნდი ვერც ერთი სისტემით ვეღარ მოიგებს. აქ ლაპარაკია ქვეყნის ინტერესებზე და მომავალზე. მომავალში არც ერთ პარტიას არ უნდა ჰქონდეს შესაძლებლობა, რომ მესამედზე ნაკლებით უმრავლესობა მოიპოვოს ან ნახევრით - საკონსტიტუციო უმრავლესობა. უნდა ჰქონდეს არსებითი უპირატესობა და მხარდაჭერა, რომ ჰქონდეს შანსი უმრავლესობის მოპოვების“, - აღნიშნა გიგა ბოკერიამ.  

მისივე თქმით, თუ გონს არ მოეგება ივანიშვილი, ოპოზიცია  გააგრძელებს საპროტესტო აქციებს. „გავაგრძელებთ ხაზგასმით მწვავე, მაგრამ მშვიდობიან პროტესტს, როგორც ეს აქამდე იყო. ვნახოთ როგორ გაუძლებენ ამას. მაგრამ როგორც მრავალგზის ვთქვით და გავიმეორებ, ცუდი სცენარისთვისაც ვართ მზად. ხომ ამბობენ დღევანდელ სისტემას დავტოვებთო, მაგ სისტემაშიც დამარცხდებიან, ოღონდ ეგ არ იქნება ნორმალური სცენარი. ამ შემთხვევაში ერთმანეთისგან განსხვავებული პარტიები იმოქმედებენ შეჯერებული სცენარით მაჟორიტარულ კანდიდატებზე, სადაც ეს საჭიროა. ანუ რაზეც გათვლა აქვს ივანიშვილს, ის არ იმუშავებს და კიდევ უფრო დაზიანდება. მისი პოლიტიკური ბედი იქნება დრამატული. მათ ვურჩევ რომ გონს მოეგონ“, - განაცხადა ბოკერიამ. 

საპარლამენტო და არასაპარლამენტო ოპოზიცია „ლეიბორსიტული პარტიის“ ოფისში საარჩევნო სისტემის მოდელზე მსჯელობს. ხელისუფლებამ ოპონენტებს შერეულ საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-სა, ხოლო მაჟორიტარული მანდატები 50-მდე შემცირდება. 

იმ შემთხვევაში თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.