დავით ბაქრაძე: ხელისუფლება თვეების განმავლობაში მკაფიოდ ცდილობდა გიგი უგულავას ნებისმიერი საბაბით დაკავებას

„გიგი უგულავას დაპატიმრებით, საქართველოში დაწესდა კიდევ ერთი სამარცხვინო პრეცედენტი, რომ ამ ქვეყანაში აღარ არსებობს არანაირი ინსტიტუტი, რომ აღარ არსებობს სასამართლო და აღარ არსებობს სამართალი“, - ეს განცხადება „ევროპული საქართველოს“ ერთ-ერთმა ლიდერმა დავით ბაქრაძემ მას შემდეგ გააკეთა რაც  უზენაესმა სასამართლომ გიგი უგულავას ე.წ. ფონდის საქმეზე 3-წლიანი პატიმრობა შეუფარდა.

„ბოლო თვეების განმავლობაში ძალიან მკაფიოდ ჩანდა ხელისუფლების და ბიძინა ივანიშვილის გადაწყვეტილება, რომ ნებისმიერ საქმეზე, ნებისმიერი ფასით და საბაბით დაეკავებინათ გიგი უგულავა. მაგრამ ის რა საბაბითაც ხდება გიგი უგულავას დაკავება, ეს ნიშნავს იმას, რომ საქართველოში დაწესდა კიდევ ერთი სამარცხვინო პრეცედენტი, რომ ამ ქვეყანაში აღარ არსებობს არანაირი ინსტიტუტი. რომ ქვეყანაში აღარ არსებობს სასამართლო და ამ ქვეყანაში აღარ არსებობს სამართალი. დღეს გიგი უგულავას მიუსაჯა პროკურორმა შალვა თადუმაძემ, უწიგნურმა და უდიპლომო შალვა თადუმაძემ, რომელმაც როგორც პროკურორმა საჩივარი გააგზავნა უზენაესში და როგორც უზენაესის თავმჯდომარე დახვდა საკუთარ გაგზავნილ საჩივარს“, - განაცხადა ბაქრაძემ.  

მისი თქმით, გიგი უგულავას განაჩენი არის „ქართული ოცნების“ განაჩენი, რომელიც ძალიან მძიმედ დაუჯდებათ. „ეს ბრძოლა იქნება არაძალადობრივი და მშვიდი. ღირსეულად, მშვიდად და არაძალოდობრივად გავაგრძელებთ ბრძოლას. ქვეყანაში დავასრულებთ პოლიტიკურ მართლმსაჯულებას. „ქართულმა ოცნებამ“ ამ ქვეყანაში დაასრულა მოლაპარაკების პოლიტიკური რესურსი“, - განაცხადა დავით ბაქრაძემ. 

უზენაესმა სასამართლომ გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 3 წლითა და 2 თვით თავისუფლების აღკვეთა შეუფარდა.

პროკურატურა გიგი უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლაგვას ედავებოდა. 2018 წელს საქალაქო სასამართლომ ყოფილ მერს აღნიშნულ საქმეზე 1 წლითა და 3 თვით თავისუფლების აღკვეთა შეუფარდა, თუმცა სხვა საქმეზე გამოტანილმა განაჩენმა ახალი განაჩენი შთანთქა და სასამართლომ სასჯელი მოხდილად ჩაუთვალა.