მამუკა მდინარაძე კინგზინგერის განცხადებაზე: „ქართული ოცნების“ ხელში სასამართლო პოლიტიკური იარაღი არასოდეს იქნება

ვეთანხმები ადამ კინზინგერს, რომ სასამართლოს იარაღად გამოყენება დემოკრატია არ არის და ეს ჩვენს ქვეყანაში არ ხდება. ეს ხდებოდა 2012 წლამდე - ამის შესახებ საპარლამენტო უმრავლესობის ლიდერმა, მამუკა მდინარაძემ გიგი უგულავას დაკავებაზე ამერიკის სენატორის განცხადების შეფასებისას თქვა.

მისი თქმით, „ქართული ოცნების“ სასამართლო ხელში პოლიტიკური იარაღი არ არის და საქართველოში ასე არასოდეს არ იქნება. მდინარაძის განმარტებით, გიგი უგულავას საქმეზე უზენაესი სასამართლოს მიერ მიღებულ გადაწყვეტილებასთან დაკავშირებით ოპოზიცია ქართულ საზოგადოებას და როგორც ჩანს, საერთაშორისო პარტნიორებსაც ატყუებს, რომ თითქოს უგულავა ერთ საქმეზე ორჯერ გასამართლდა.

„მსგავსი არაფერი მომხდარა. ერთ საქმეზე ორჯერ მოუწია მას ციხეში ჯდომა იმიტომ, რომ უზენაესმა სასამართლომ გაიზიარა  პროკურატურის პოზიცია, რომლის მიხედვითაც მან დაადგინა, რომ საქმე გვაქვს გაფლანგვასთან და არა უფლებამოსილების გადამეტებასთან, როგორც ეს ორი ინსტანციის სასამართლომ თქვა და შეუფარდა შესაბამისი სასჯელი. მას მოხდილი ჰქონდა ერთი წელი და 3 თვე, რაც 4 წლიდან და 5 თვიდან ჩაუთვალა სასამართლომ  და იმიტომ დარჩა 3 წელი და 2 თვე. ამიტომ, ორჯერ ერთსა და იმავე საქმეზე გასამართლება არის  აბსოლუტური ტყუილი და სამწუხაროა, თუ ბატონმა ადამ კინზინგერმა  ეს გაიზიარა. ის მიიღებს რეალურ ინფორმაციას. ნებისმიერი ჩვენი პარტნიორი, სტრატეგიული პარტნიორის წარმომადგენელი  მიიღებს რეალურ ინფორმაციას და გარწმუნეთ, რომ არ დარჩება ობიექტურად მოფიქრალი არც ერთი ადამიანი მსოფლიოში, რომელიც იტყვის, რომ გიგი უგულავა ერთ საქმეზე ორჯერ გასამართლდა“, - განაცხადა მამუკა მდინარაძემ.

ადამ კინზინგერი უგულავას დაკავებას Twitter-ში გამოეხმაურა. როგორც სენატორმა აღნიშნა, სასამართლოების იარაღად გამოყენება დემოკრატია არ არის.

უზენაესმა სასამართლომ თბილისის ყოფილი მერი ე.წ. ფონდის საქმეზე თანხის გაფლანგვაში დამნაშავედ ცნო და 3 წლითა და 2 თვით თავისუფლების აღკვეთა შეუფარდა.

პროკურატურა გიგი უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლაგვას ედავებოდა. 2018 წელს საქალაქო სასამართლომ ყოფილ მერს აღნიშნულ საქმეზე 1 წლითა და 3 თვით თავისუფლების აღკვეთა შეუფარდა, თუმცა სხვა საქმეზე გამოტანილმა განაჩენმა ახალი განაჩენი შთანთქა და სასამართლომ სასჯელი მოხდილად ჩაუთვალა.

გიგი უგულავა ე.წ. მატროსოვის ციხეში 10 თებერვალს გადაიყვანეს.