ანრი ოხანაშვილი: ოპოზიციამ უგულავას განაჩენი მოლაპარაკებების პროცესიდან გასვლის საბაბად გამოიყენა

პარლამენტის შტურმით აღების მცდელობის შემდეგ ოპოზიციური ძალები იძულებულები გახდნენ, დამსხდარიყვნენ მოლაპარაკებათა მაგიდასთან, თუმცა ყველა ამ შეხვედრაზე ისინი ეძებდნენ საბაბს, რომ როგორღაც გასულიყვნენ ამ პროცესიდან. უგულავას წინააღმდეგ გამოტანილი განაჩენი მათ სწორედ ასეთ საბაბად გამოიყენეს, - ამის შესახებ გადაცემა „არენაში“ იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

მისივე თქმით, სამართლებრივი სახელმწიფოს პრინციპი ნიშნავს იმას, რომ ყველა სისტემა პოლიტიკის მიღმა უნდა ფუნქციონირებდეს.

„პროკურატურამ უნდა აკეთოს თავისი საქმე, ისევე როგორც სხვა ინსტიტუტებმა. რა უნდა გაგვეკეთებინა? ჩავრეულიყავით სასამართლო ხელისუფლებაში და გვეთქვა, რომ გადაწყვეტილება ახლა არ გამოეტანათ? მთელმა საზოგადოებამ პირდაპირ ეთერში იხილა, როგორ იგეგმებოდა პარლამენტის შტურმის აღება. როგორი მოწოდებები ჰქონდათ ამ ლიდერებს, ერთ-ერთი მათგანის წინააღმდეს საქმეც არის აღძრული. ჩვენ ვიხილეთ დესტრუქციული, რევანშისტული მოქმედებები. პარადოქსია, როგორი განსხვავებული პოლიტიკური ორიენტაციის ჯგუფები დადგნენ ერთად და თითქოს ქადაგებენ დემოკრატიას. ვის რა პოლიტიკური ორიენტაცია აქვს, ეს ცალკე თემაა, მაგრამ ეს ადამიანები გვეუბნებიან, რომ ისინი მოლაპარაკებათა მაგიდასთან ჩვენს გამო არ სხდებიან.

რეალურად, მათ არასდროს ჰქონიათ სურვილი, დამსხდარიყვნენ მოლაპარაკებათა მაგიდასთან. ჯგუფს, რომელსაც რევანშის სურვილი ამოძრავებს, მშვიდობა ქვეყანაში არ აწყობს. გავიხსენოთ ბათუმის მოვლენები, პარლამენტის შენობის შტურმით აღების მცდელობა. ეს არ გამოუვიდათ, საერთაშორისო პარტნიორების წნეხის ქვეშ აღმოჩნდნენ და იძულებულები გახდნენ, დამსხდარიყვნენ მოლაპარაკებათა მაგიდასთან. თუმცა ყველა ამ შეხვედრაზე ისინი ეძებდნენ საბაბს, რომ როგორღაც გასულიყვნენ ამ პროცესიდან. უგულავას წინააღმდეგ გამოტანილი განაჩენი მათ სწორედ ასეთ საბაბად გამოიყენეს. რეალურად ეს განაჩენი გიგი უგულავას და „ნაციონალური მოძრაობის“ წისქვილზე ასხამს წყალს. ისინი დღეს ბედნიერები არიან, ვინაიდან სწორედ „ქართული ოცნებას“ არ აწყობს ამ სიტუაციაში ვინმეს პასუხისგებაში მიცემა“, - განაცხადა ოხანაშვილმა.

უზენაესმა სასამართლომ თბილისის ყოფილი მერი ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. 

პროკურატურა გიგი უგულავას მერობის პერიოდში თბილისის განვითარების ფონდიდან 48 მილიონი ლარის მითვისება-გაფლაგვას ედავებოდა. 2018 წელს საქალაქო სასამართლომ ყოფილ მერს აღნიშნულ საქმეზე 1 წლითა და 3 თვით თავისუფლების აღკვეთა შეუფარდა, თუმცა სხვა საქმეზე გამოტანილმა განაჩენმა ახალი განაჩენი შთანთქა და სასამართლომ სასჯელი მოხდილად ჩაუთვალა.

გიგი უგულავა ე.წ. მატროსოვის ციხეში 10 თებერვალს გადაიყვანეს. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.