გიორგი გახარია ჰააგის სასამართლოს პროკურორ ფატუ ბენსუდას შეხვდა

2008 წლის აგვისტოს ომის საქმეზე მიმდინარე გამოძიებაზე ისაუბრეს საქართველოს პრემიერ-მინისტრმა გიორგი გახარიამ და სისხლის სამართლის საერთაშორისო სასამართლოს პროკურორმა ფატუ ბენსუდამ შეხვედრაზე, რომელიც დღეს მიუნხენის უსაფრთხოების კონფერენციის ფარგლებში გაიმართა.

საუბრისას აღინიშნა ქართული მხარის ნაყოფიერი თანამშრომლობა პროკურორის ოფისთან, რათა დეტალურად იყოს გამოძიებული ქართული მხარისთვის სასიცოცხლოდ მნიშვნელოვანი პრიორიტეტები, როგორებიცაა ქართველების ეთნიკური წმენდა 2008 წლის აგვისტოს ომის დროს, ქართველი სამხედრო ტყვეების წამება და წამების შედეგად დამდგარი სიცოცხლის ხელყოფის ფაქტები.

სისხლის სამართლის საერთაშორისო სასამართლოს პროკურორმა აღნიშნა გამოძიებაში არსებული პროგრესი და ყურადღება გაამახვილა იმ ძალიან დიდ ძალისხმევაზე, რომლის გაწევაც მის გამომძიებლებს უხდებათ, რომ გამოძიება კიდევ უფრო ნაყოფიერად და სწრაფი ტემპით წარიმართოს.

ქართულმა მხარემ შეხვედრაზე კიდევ ერთხელ დაადასტურა მზადყოფნა, მომავალშიც განაგრძოს პროკურორის ოფისთან თანამშრომლობა და ხელი შეუწყოს მას აგვისტოს ომის დროს ეთნიკური ქართველების უფლებების მასობრივი დარღვევის ფაქტების წარმატებით გამოძიების პროცესში. შეხვედრას საქართველოს ვიცე-პრემიერი, იუსტიციის მინისტრი თეა წულუკიანი და პრემიერ-მინისტრის მრჩეველი საერთაშორისო ურთიერთობათა საკითხებში ირაკლი ჩიქოვანი დაესწრნენ.

„პრემიერ-მინისტრი შეხვდა ქალბატონ ფატუ ბენსუდას, რომელსაც რამდენიმე წელია, აგვისტოს ომის საქმეზე გამოძიება მიჰყავს. ქართული მხარე ვთანამშრომლობთ მასთან იმისთვის, რომ სასიცოცხლოდ მნიშვნელოვანი პრიორიტეტები დეტალურად იყოს გამოძიებული. ეს პრიორიტეტები ჩვენთვის არის ქართველების ეთნიკური წმენდა აგვისტოს ომის დროს და რა თქმა უნდა, ჩვენი სამხედრო ტყვეების წამება და არაერთ შემთხვევაში წამების შედეგად სიცოცხლის ხელყოფის ფაქტები.

ჩვენ პროკურორისგან მივიღეთ ინფორმაცია იმასთან დაკავშირებით, რომ ქალბატონი პროკურორი და მისი გუნდი გამოძიებაში პროგრესს ხედავენ და ძალიან დიდი ძალისხმევის გაწევა უწევთ იმისთვის, რომ გამოძიება უფრო ნაყოფიერად და სწრაფი ტემპით წარიმართოს“, - განუცხადა ჟურნალისტებს თეა წულუკიანმა. 

თავად ჰააგის სასამართლოს პროკურორი ქართულ მხარესთან თანამშრომლობით კმაყოფილია.

„ნამდვილად გვაქვს პროგრესი. ბევრი გამოწვევაა და ვცდილობთ იმ გზების მოძებნას, როგორ შეიძლება მოვიპოვოთ მტკიცებულებები. ნამდვილად გვაქვს ხელშესახები პროგრესი, მაგრამ გამოძიების კონფიდენციალურობიდან გამოდინარე, ვერაფერს გეტყვით. შემიძლია, დაგიდატუროთ, რომ ნამდვილად კარგად ვთანამშრომლობთ ქართულ მხარესთან და ახლა ვცდილობთ, ვიპოვოთ გზები, როგორ შეიძლება მეტი მტკიცებულების მოპოვება“ , - განაცხადა ფატუ ბენსუდამ.