საქართველოს წინააღმდეგ განხორციელებულ რუსულ კიბერშეტევას უცხოური მედია ეხმაურება

საქართველოს წინააღმდეგ განხორციელებულ რუსულ კიბერშეტევას იტალიური, ფრანგული და ნიდერლანდური მედია ეხმაურება. იტალიური გამოცემების სტატიებში აღნიშნულია, რომ საქართველო, აშშ და დიდი ბრიტანეთი ბრალს დებენ რუსეთს  „თავზეხელაღებულ“ კიბერნეტიკულ შეტევაში. იტალიურ გამოცემებში ასევე გამოქვეყნებულია საქართველოს საგარეო საქმეთა სამინისტროს პრესსპიკერის, ვლადიმერ კონსტანტინიდის განაცხადება.

იტალიური გამოცემა Agenzianova აქვეყნებს სტატიას სათაურით „საქართველო: ამერიკის შეერთებული შტატები გმობს 28 ოქტომბრის რუსეთის ჰაკერულ შეტევას“. როგორც სტატიის ავტორი წერს, ამერიკის შეერთებული შტატები მოუწოდებს რუსეთს, შეწყვიტოს ინფორმატიკული შეტევები საქართველოს წინააღმდეგ. სტატიაში ასევე გამოქვეყნებულია აშშ-ის სახელმწიფო მდივნის, მაიკ პომპეოს განაცხადება, რომელმაც დაგმო ე.წ. გრუ-ს ტექნოლოგიების განსაკუთრებული ცენტრის მიერ გასულ ოქტომბერს განხორციელებული შეტევები.

„2019 წლის 28 ოქტომბერს გრუ-ს სპეციალური ტექნოლოგიების მთავარმა ცენტრმა საქართველოს წინააღმდეგ ფართომასშტაბიანი, შემაფერხებელი კიბერშეტევა განახორციელა. ინციდენტმა, რომელმაც პირდაპირ იმოქმედა საქართველოს მოსახლეობაზე, შეაფერხა საქართველოს მთავრობისა და კერძო საკუთრებაში არსებული რამდენიმე ათასი ვებგვერდის მუშაობა და სულ მცირე ორი მთავარი სატელევიზიო არხის ტრანსლაცია. ეს ქმედება ეწინააღმდეგება რუსეთის მცდელობებს, რომ კიბერსივრცეში თავი პასუხისმგებლიან აქტორად წარმოაჩინოს და წარმოადგენს რუსეთის გრუ-ს მიერ რიგი ქვეყნების წინააღმდეგ განხორციელებულ უპასუხისმგებლო კიბეროპერაციების უწყვეტ სქემას. ამ ოპერაციების მიზანია განხეთქილების შეტანა, დაუცველობის შექმნა და დემოკრატიული ინსტიტუტებისთვის ძირის გამოთხრა. ჩვენ, აგრეთვე, პირობას ვდებთ საქართველოსა და მისი ხალხის წინაშე, რომ მხარს დავუჭერთ კიბერუსაფრთხოების გაძლიერებაში და მავნე კიბერაქტორებთან ბრძოლაში. საქართველოს საჯარო ინსტიტუტების განმტკიცებისა და მისი შესაძლებლობის გაძლიერებისთვის, ჩვენ საქართველოს შევთავაზებთ დამატებითი შესაძლებლობების განვითარებას და ტექნიკურ დახმარებას, მსგავსი ქმედებებისგან თავდასაცავად“, - აღნიშნულია განცხადებაში.

ფრანგულ გამოცემა RFI-ში გამოქვეყნდა საქართველოში სპეციალური კორესპონდენტის, რეჟის ჟანტეს სტატია სათაურით „საქართველო და მისი დასავლელი მოკავშირეები რუსეთის გრუ-ს კიბერშეტევაში ადანაშაულებენ“. სტატიაში აღნიშნულია, რომ 2019 წლის 28 ოქტომბერს საქართველოში განხორციელებული ფართომასშტაბიანი კიბერშეტევა დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ.

სტატიაში ასევე გამოქვეყნებულია გაერთიანებული სამეფოს საგარეო საქმეთა მინიტრის განცხადება. გაერთიანებული სამეფოს საგარეო საქმეთა მინისტრის, დომინიკ რააბის ტქმით, გრუ-ს უპასუხისმგებლო და თავზეხელაღებული კიბერშეტევების კამპანია საქართველოს, სუვერენული და დამოუკიდებელი სახელმწიფოს, წინააღმდეგ კატეგორიულად მიუღებელია.

ავტორი ასევე იმოწმებს აშშ-ის სახელმწიფო დეპარტამენტის განცხადებას. „ამ ოპერაციის მიზანია განხეთქილების შეტანა, დაუცველობის შექმნა და დემოკრატიული ინსტიტუტებისთვის ძირის გამოთხრა", - ნათქვამია აშშ-ის სახელმწიფო დეპარტამენტის განცხადებაში.

რეჟის ჟანტე აღნიშნავს, რომ აღნიშნულმა კიბერშეტევამ აჩვენა, რომ ამჟამინდელი ხელისუფლების მიერ რუსეთის მიმართ წარმოებული დათბობის  პოლიტიკა არ იცავს მას ამ უკანასკნელის აგრესიისგან. ამავე თემაზე ინფორმაციები გამოქვეყნდა გამოცემებში, Le Figaro და Le Monde.

ნიდერლანდური პრესა წერს, რომ ნიდერლანდების საგარეო საქმეთა მინისტრი სტეფ ბლოკი მომხდარზე პასუხისმგებლობას რუსეთის ფედერაციას აკისრებს და საერთაშორისო პარტნიორებთან ერთად გმობს რუსეთის ამ ქმედებას.

სტატიებში ასევე აღნიშნულია, რომ მომხდარმა კიბერშეტევამ საქართველოში 15000-მდე სახელმწიფო და კერძო ვებგვერდი დააზარალა.

2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებგვერდებზე, სერვერებსა და სხვა მართვით სისტემებზე. კიბერშეტევის შედეგად დაზიანდა ამ ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება.

გამოძიებამ დაადგინა, რომ საქართველოს პრეზიდენტისა და სხვა ოფიციალური უწყებების ვებგვერდებზე კიბერშეტევა რუსეთმა განახორციელა.

ამის შესახებ საგარეო საქმეთა სამინისტროში გამართულ ბრიფინგზე 20 თებერვალს განაცხადეს.