საქართველოს წინააღმდეგ განხორციელებულ რუსულ კიბერშეტევას ავსტრალიური, თურქული და ბრიტანული მედია ეხმაურება

საქართველოს წინააღმდეგ განხორციელებულ რუსულ კიბერშეტევას ავსტრალიური, თურქული და ბრიტანული მედიაც ეხმაურება. ავსტრალიურ გამოცემებში გამოქვეყნებულ ინფორმაციაში მოყვანილია საქართველოს საგარეო საქმეთა სამინისტროს განცხადება. სტატიებში ასევე აღნიშნულია, რომ შეერთებულმა შტატებმა და ბრიტანეთმა მკაცრად დაგმეს რუსეთის მიერ განხორციელებული სავარაუდო ქმედება.

ავსტრალიურ მედია საშუალებებში ასევე ვრცელდება ინფორმაცია საქართველოზე განხორციელებულ კიბერთავდასხმებთან დაკავშირებით.

გამოქვეყნებულ ინფორმაციაში მოყვანილია საქართველოს საგარეო საქმეთა სამინისტროს განცხადება. „2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებგვერდებზე, სერვერებსა და სხვა მართვით სისტემებზე.

კიბერშეტევის შედეგად დაზიანდა ზემოაღნიშნული ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება. აღნიშნული კიბერშტევა მიზნად ისახავდა საქართველოს ეროვნული უსაფრთხოების ხელყოფას, საქართველოს მოსახლეობისათვის ზიანის მიყენებას და სამთავრობო სტრუქტურების, ასევე სხვადასხვა ორგანიზაციების ფუნქციონირების შეფერხებით და მოშლით საზოგადოებაში მღელვარების დათესვას“, - აღნიშნულია განცხადებაში.

სტატიებში ნათქვამია, რომ საქართველოს ხელისუფლებამ რუსეთის გენერალური შტაბის დაზვერვის მთავარი სამმართველო („გრუ“) დაადანაშაულა ფართომასშტაბიანი კიბერშეტევის განხორციელებაში, რომელიც მიზნად ისახავდა ქვეყნის დესტაბილიზაციას. სტატიებში ასევე აღნიშნულია, რომ შეერთებულმა შტატებმა და ბრიტანეთმა მკაცრად დაგმეს რუსეთის მიერ განხორციელებული სავარაუდო ქმედება.

2020 წლის 20 თებერვალს, თურქულმა პრესამ ფართოდ გააშუქა საქართველოში განხორციელებული ფართომასშტაბიანი კიბერშეტევის ფაქტი.

სტატიებში ნათქვამია, რომ საქართველომ რუსეთი დაადანაშაულა გასული წლის 28 ოქტომბერს, საქართველოში განხორციელებული ფართომასშტაბიანი კიბერშეტევის ორგანიზებაში, რამაც დააზიანა სახელმწიფო უწყებების სერვერები. ასევე, აღნიშნულია, რომ ქართული მხარის მიერ ჩატარებული გამოძიებით და საერთაშორისო პარტნიორებთან ურთიერთთანამშრომლობის შედეგად მიღებული ინფორმაციის შესაბამისად, ხსენებული კიბერშეტევა დაიგეგმა და განხორციელდა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ.

ამასთან, სტატიების თანახმად, საქართველოს საგარეო საქმეთა სამინისტროს პრეს-სპიკერის, ვლადიმერ კონსტანტინიდის განცხადებით, ზემოხსენებული კიბერშტევა მიზნად ისახავდა საქართველოს ეროვნული უსაფრთხოების ხელყოფას, საქართველოს მოსახლეობისათვის ზიანის მიყენებას და სამთავრობო სტრუქტურების, ასევე სხვადასხვა ორგანიზაციების ფუნქციონირების შეფერხებას და მოშლას. 

კონსტანტინიდის თქმით, საქართველო გმობს აღნიშნულ კიბერშეტევას, რაც ეწინააღმდეგება საერთაშორისო სამართლის პრინციპებსა და ნორმებს და წარმოადგენს საქართველოს სუვერენიტეტის მორიგ ხელყოფას.

თურქულმა პრესამ ასევე ყურადღება გაამახვილა რუსეთის საგარეო საქმეთა მინისტრის მოადგილის, ანდრეი რუდენკოს განცხადებაზე, რომლითაც რუსული მხარე უარყოფს  აღნიშნული კიბერშეტევის ორგანიზებას.

2019 წლის ოქტომბერში „გრუ“-ს მხრიდან საქართველოზე განხორციელებულ კიბერ-შეტევას ფართოდ ეხმაურებიან ბრიტანული მედია-საშუალებებიც.

სტატიებში აღნიშნულია, რომ საქართველომ, დიდმა ბრიტანეთმა და საერთაშორისო პარტნიორებმა საქართველოს წინააღმდეგ გასულ წელს არაერთი მნიშვნელოვანი კიბერ-თავდასხმის განხორციელებაზე  პასუხისმგებლობა GRU– ს, რუსეთის სამხედრო სადაზვერვო სამსახურს  დააკისრეს.

სტატიებში ნათქვამია, რომ ყველაზე დიდმა შეტევამ, 28 ოქტომბერს,  ათასობით ვებგვერდი დააზიანა და  ორმა ტელევიზიამ „იმედმა“ და „მაესტრომ“ რამდენიმე საათის განმავლობაში მაუწყებლობა შეწყვიტეს. დიდი ბრიტანეთის კიბერუსაფრთხოების ეროვნული ცენტრის (NCSC) განცხადებით, აღნიშნულ ფაქტზე  GRU იყო „თითქმის ნამდვილად” (95 პროცენტზე მეტით) პასუხისმგებელი. მათივე განცხადებით, აღნიშნული შეტევები არის რუსეთის მიერ განხორციელებული გრძელვადიანი კამპანიის ნაწილი საქართველოს წინააღმდეგ. აქვე აღნიშნულია, რომ დიდი ბრიტანეთის მთავრობის განცხადებით,  კიბერ-შეტევები განხორციელდა საქართველოს სუვერენიტეტის შელახვისა და ქართველი ხალხის ცხოვრების განადგურების მიზნით. აღსანიშნავია, რომ დღეს კვლავ განაგრძობს ბრიტანული მედია საქართველოს წინააღმდეგ განხორციელებულ კიბერ-თავდასხმაზე გამოხმაურებას.

2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებგვერდებზე, სერვერებსა და სხვა მართვით სისტემებზე. კიბერშეტევის შედეგად დაზიანდა ამ ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება.

გამოძიებამ დაადგინა, რომ საქართველოს პრეზიდენტისა და სხვა ოფიციალური უწყებების ვებგვერდებზე კიბერშეტევა რუსეთმა განახორციელა.

ამის შესახებ საგარეო საქმეთა სამინისტროში გამართულ ბრიფინგზე 20 თებერვალს განაცხადეს.