სერგი კაპანაძე: თუ პროპორციული არჩევნები არ დაინიშნა, ოპოზიცია გეგმა ბ-ს მიხედვით იმოქმედებს

„ევროპული საქართველოს“ ერთ-ერთი ლიდერი, სერგი კაპანაძე ამბობს, რომ ოპოზიციური პარტიები რიგ ოლქებში საერთო კანდიდატებზე უკვე შეთანხმდნენ, დანარჩენ ოლქებში ასეთი შეთანხმების მიღწევის დიდი შანსი არსებობს.

„ოპოზიცია მუშაობს გეგმა ბ-ზე. იმ შემთხვევაში, თუ ბიძინა ივანიშვილი არ გადავა პროპორციულ საარჩევნო სისტემაზე და დღევანდელ უსამართლო სისტემას დატოვებს, ჩვენ გვაქვს გეგმა, რომ მაჟორიტარულ ოლქებში მოვახდინოთ ოპოზიციურმა პარტიებმა კოორდინაცია და გვყავდეს საერთო კანდიდატები. ეს სამუშაო წინ არის წაწეული, ვართ შეთანხმებული უკვე კონკრეტულ ოლქებზე და გვარებზე. დარჩა კიდევ გასავლელი რამდენიმე ოლქი, მაგრამ ჯამში გვაქვს დიდი პროგრესი და მალე გვექნება ყველა მნიშვნელოვან ოლქში, პირველ რიგში თბილისში და მერე სხვაგანაც შეთანხმებები. ეს არის გარანტია, რომ „ქართული ოცნება“ ფიზიკურად ვერ გაიმარჯვებს, იმიტომ რომ მას.ეყოლება ერთი მოწინააღმდეგე. ეს არის ივანიშვილისთვის გამოწვევა. მან ან ამ სისტემით უნდა მიიღოს მონაწილეობა და დამარცხდეს, იმიტომ რომ ეს სისტემა აძლევს უპირატესობას გამარჯვებულ პოლიტიკურ ძალას და ჩვენი წარმატების შემთხვევაში მისი პოლიტიკური გუნდი განადგურდება, ან შეინარჩუნოს შანსი და გადაიყვანოს არჩევნების სისტემა ქვეყნისთვის უფრო პროგრესულ ვარიანტზე.

„ნებისმიერ შემთხვევაში თანამშრომლობა, კოორდინაცია, მხარის დაჭერა ან კონკურენტის არდაყენება ასევე არის განხილვის საგანი. ჩვენი ამოცანაა, მაქსიმალურად კოორდინირებულად, ერთიანი ფრონტით ყველა ერთის წინააღმდეგ იყოს არჩევნებზე, თუ ის ქვეყანაში სისტემა დარჩება, რომლითაც ბიძინა ივანიშვილს გამარჯვების იმედი აქვს. ოღონდ ამ სისტემის მიხედვით ის უფრო მეტად დამარცხდება, ვიდრე პროპორციულ სისტემაში“, - აღნიშნა კაპანაძემ.

21 თებერვალს „ლეიბორისტული პარტიის“ ოფისში გამართულ შეხვედრაზე ოპოზიცური პარტიების წარმომადგენლები შეთანხმდნენ, რომ მხოლოდ დიპლომატებს შეხვდებიან და მათი მეშვეობით გაიგებენ, რას აპირებს ხელისუფლება. თავად ოპოზიციას კვლავ სამი პირობა აქვს: მეტი პროპორციულობა, პოლიტპატიმრების გათავისუფლება და საარჩევნო კოდექსში რამდენიმე ცვლილების შეტანა.