გიორგი ვაშაძე: ხელისუფლებას ახალი ვერსია აქვს - 110-40-ზე, თუმცა ჩვენ ამას ვერ დავეთანხმებით

„ხელისუფლება იზოლაციაშია - ან მთლიანად გადაუსვამს დიპლომატების მოთხოვნას ხაზს, ან გონს მოეგება, - ამის შესახებ „ახალი საქართველოს“ ლიდერმა გიორგი ვაშაძემ განაცხადა, რომელმაც საარჩევნო სისტემაზე ხელისუფლებასთან დიალოგის აღდგენის აუცილებლობის შესახებ კომენტარი გააკეთა.

„სიახლე არის ის, რომ შეხვედრაზე ხელისუფლებამ ახალი რიცხვები დაასახელა 110-40-ზე, თუმცა ჩვენ ამას ვერ დავეთანხმებით. ვნახოთ, კიდევ რას იტყვიან მმართველი გუნდის წევრები. ჩემთვის დიდი აზრი არ აქვს ამ შეხვედრებს, რადგან ხელისუფლება იზოლაციაშია: ან მთლიანად გადაუსვამს დიპლომატების მოთხოვნას ხაზს, ან გონს მოეგება“, - განაცხადა გიორგი ვაშაძემ ევროკავშირის ელჩის რეზიდენციაში შეხვედრის შემდეგ.

25 თებერვალს საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.

ხელისუფლებამ ოპონენტებს შერეული საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება.

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.