დავით უსუფაშვილი: ეს იყო საერთაშორისო მეგობრების ბოლო მცდელობა, რომ პოზიციები დაეახლოებინათ

ეს იყო საერთაშორისო მეგობრების ბოლო მცდელობა, რომ პოზიციები დაეახლოებინათ, - ამის შესახებ პარტია “შენების მოძრაობის“ ლიდერმა, დავით უსუფაშვილმა ევროკავშირის ელჩის, კარლ ჰარცელის რეზიდენციაში გამართული შეხვედრის შემდეგ ჟურნალისტებს განუცხადა.

"კონკრეტულ შეთანხმებასთან არ გვაქვს საქმე, საუბარი იყო სად შეიძლება მოიძებნოს შეთანხმების წერტილი და ბალანსი სამართლიანი სისტემისა და იმის, რომ მცირე მხარდაჭერის მქონე ძალამ ვერ მოიპოვოს უმრავლესობა. რაც შეეხება ციფრებს, გიორგი ვაშაძე ცოტა ხნით იყო ამ შეხვედრაზე და საუბრის მხოლოდ იმ ნაწილს შეეხო, რასაც ესწრებოდა. კონკრეტულ შემოთავაზებაზე დათანხმება არდათანხმება არ დგას ახლა დღის წესრიგში. გვინდა, რომ ეს კონსულტაციები შედეგით დასრულდეს. დღეს იყო განცდა მონაწილეებში, რომ საჭიროა შეთანხმება და შეიძლება შეთანხმებაც მოხერხდეს. სამწუხაროდ, ქართველებს გვჭირდება სადილები და საუზმეები დიპლომატებთან, რომ ჩვენი ქვეყნის პრობლემებზე ვისაუბროთ", - განაცხადა უსუფაშვილმა.

საპარლამენტო უმრავლესობის წევრმა, ირაკლი კობახიძემ ოპოზიციისთვის 110/40-ზე საარჩევნო სისტემის შეთავაზების შესახებ ინფორმაცია უარყო. ამის შესახებ მან ევროკავშირის ელჩის რეზიდენციაში გამართული შეხვედრის შემდეგ ჟურნალისტებს განუცხადა.

ამავე შეხვედრიდან გამოსულმა გიორგი ვაშაძემ დღეს ჟურნალისტებს უთხრა, რომ ხელისუფლებას ახალი ვერსია აქვს - 110-40-ზე, თუმცა „ჩვენ ამას ვერ დავეთანხმებით“.

25 თებერვალს საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.

ხელისუფლებამ ოპონენტებს შერეული საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება.

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.