მარიამ ჯაში: პროპორციულ არჩევნებთან უფრო ახლოს ვართ, ვიდრე ამას დღევანდელი მოდელი ან 100/50-ზე ითვალისწინებს

მიღწეულია შეთანხმება, რომ არ ვაჟღერებთ მედიაში კონკრეტულ ციფრებსა და ვადებს, ვიდრე არ იქნება საბოლოო, თუნდაც ფორმალური წინადადება, - ამის შესახებ პარლამენტის დამოუკიდებელმა დეპუტატმა, მარიამ ჯაშმა ჟურნალისტებს გერმანიის ელჩის რეზიდენციაში ოთხსაათიანი შეხვედრის დასრულების შემდეგ განუცხადა.

„საბოლოო კონსენსუსი ჯერ არაა მიღწეული, ამიტომ ჯერ რთულია იმის თქმა, როდის ჩაინიშნება მეხუთე რაუნდი. იმედი გვაქვს, რომ იქნება შემხვედრი ნაბიჯები. მინდა აღვნიშნო დიპლომატიური კორპუსის ძალისხმევა. მათ მოუწოდეს ყველ წამყვან პოლიტიკურ ძალას, განსაკუთრებით მმართველ პარტიას, „ევროპულ საქართველოს“ და „ნაციონალურ მოძრაობას“, გადადგან კომპრომისული ნაბიჯები, რათა დაახლოვდეს პოზიციები. მიღწეულია შეთანხმება, რომ არ ვაჟღერებთ მედიაში კონკრეტულ ციფრებსა და ვადებს, ვიდრე არ იქნება საბოლოო, თუნდაც ფორმალური წინადადება. პროგრესი ნამდვილად არის. რამდენიმე დღე მოგვიწევს დალოდება, რათა ჩამოყალიბდეს „ქართული ოცნების“ და მთავარი ოპოზიციური ძალების საბოლოო პოზიციები. ყველა თანხმდება, რომ კონსენსუსის მიღწევა უაღრესად მნიშვნელოვანია ქვეყნის ინტერესებისთვის. მოდით, დავიტოვოთ იმედი, რომ შეთანხმება შედგება და საარჩევნო გარემო ნორმალიზდება. ცოტა დრო გვაქვს, კვირაზე ნაკლები რჩება. გუშინ გაჟღერდა ახალი წინადადებები, დღეს კი ამ წინადადებებზე საპასუხო პოზიციები მოვისმინეთ. პროგრესი არის, პროპორციულ არჩევნებთან უფრო ახლოს ვართ, ვიდრე ამას დღევანდელი მოდელი ან 100/50-ზე ითვალისწინებს. ფრაქცია „დამოუკიდებელი დეპუტატების“ პოზიცია ცნობილია: ჩვენ მაქსიმალურად შევუწყობთ ხელს კონსენსუსის მიღწევას, თუმცა ასევე ვითხოვთ, რომ გაიმართოს დისკუსია სავალდებულო არჩევნების შესახებ სანქციების გამოყენების გარეშე“, - განაცხადა მარიამ ჯაშმა.

27 თებერვალს საპარლამენტო უმრავლესობის წევრმა, ირაკლი კობახიძემ ოპოზიციისთვის 110/40-ზე საარჩევნო სისტემის შეთავაზების შესახებ ინფორმაცია უარყო. ამის შესახებ მან ევროკავშირის ელჩის რეზიდენციაში გამართული შეხვედრის შემდეგ ჟურნალისტებს განუცხადა.

ამავე შეხვედრიდან გამოსულმა გიორგი ვაშაძემ ჟურნალისტებს უთხრა, რომ ხელისუფლებას ახალი ვერსია აქვს - 110-40-ზე, თუმცა „ჩვენ ამას ვერ დავეთანხმებით“.

25 თებერვალს საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.

ხელისუფლებამ ოპონენტებს შერეული საარჩევნო მოდელი 100/50 2019 წლის დეკემბერში შესთავაზა. ეს საარჩევნო მოდელი გულისხმობს პროპორციული წესით 100 დეპუტატის არჩევას, ნაცვლად 77-ისა, ხოლო მაჟორიტარული მანდატები 50-მდე შემცირდება.

იმ შემთხვევაში, თუ პოზიციები არ შეიცვლება, 2020 წლის საპარლამენტო არჩევნები მოქმედი მოდელით ჩატარდება: 77 პროპორციული და 73 მაჟორიტარული.

ოპოზიციური პარტიები უარს ამბობენ მმართველი გუნდის ახალ შეთავაზებაზე, რომელიც მათთან ინდივიდუალურ შეხვედრებს გულისხმობს. მათი თქმით, ხელისუფლებამ უგულავას დაკავებით, წითელი ხაზი გადაკვეთა, ამიტომ დიალოგის რეჟიმში დაბრუნებას არ აპირებენ.

უზენაესმა სასამართლომ თბილისის ყოფილი მერი გიგი უგულავა ე.წ. ფონდის საქმეზე თანხის გაფლანგვაში დამნაშავედ ცნო და 2020 წლის 10 თებერვალს 3 წლითა და 2 თვით თავისუფლების აღკვეთა შეუფარდა. ამის შემდეგ ოპოზიციურმა პარტიებმა მმართველ ძალასთან მოლაპარაკებებზე უარი განაცხადეს და 4 აპრილს 16:00 საათზე რუსთაველის გამზირზე საპროტესტო აქციის გამართვაზე შეთანხმდნენ.