გურამ მაჭარაშვილმა მმართველი გუნდის შეთავაზების დეტალებზე ისაუბრა

„ქართული ოცნების“ დეპუტატმა გურამ მაჭარაშვილმა მმართველი გუნდის მიერ წარდგენილია ხალი შეთავაზების დეტალებზე ისაუბრა და განაცხადა, რომ მისი მთავარი პუნქტის მიხედვით, პარტია, რომელიც 40%-ზე ნაკლებს მოიპოვებს მთავრობას ვერ დააკომპლექტებს.

„ჩვენი მხრიდან არის შეთავაზებული ოპოზიციის მიმართ ისეთი წინადადება, რომელზეც პრაქტიკულად მათ ამოწურული აქვთ ყველა რესურსი რომ არ დათანხმდნენ. ეს გახლავთ ის ე.წ. ჩამკეტი მექანიზმი, როდესაც მათ ჰქონდათ პრეტენზია, რომ პარტიას რომელიც 40%-ზე ნაკლებს მოიპოვებს, არ უნდა ჰქონდეთ საშუალება დააკომპლექტოს მთავრობა. რა თქმა უნდა, ჩვენ ამას ვეთანხმებით გამომდინარე იქიდან, რომ არასოდეს გვქონია იმის სურვილი და მოსაზრება, რომ 40%-ზე ნაკლებს ავიღებთ. ჩვენ გაცილებით მეტს ავიღებთ“, - განაცხადა „ქართული ოცნების“ დეპუტატმა.

მისივე თქმით, წინადადება პროპორციული და მაჟორიტარული სიით გასული კანდიდატების თანაფარდობას ითვალისწინებს.

„აქაც რა თქმა უდნა, ჩვენ რაციონალურ წინადადებას ვთავაზობთ, რომ მინიმუმ 40 მაჟორიტარული სისტემით დაკომპლექტებული ოლქები უნდა იყოს, რომ იყოს რაციონალური და ამით პრაქტიკულად იზრდება პროპორციული სიით გასული დეპუტატების რაოდენობა. აქაც მათ უკვე აღარ აქვთ არგუმენტები, არ დათანხმდნენ ამ წინადადებას. იმედს ვიტოვებთ, რომ ოპოზიციის ის ნაწილი, რომელიც დღეს არ არის თანახმა დათანხმდება ამ წინადადებას. იმიტომ რომ თქვენ ნახეთ საჯარო განცხადებები ოპოზიციის გარკვეული ნაწილის, რომელიც უკვე ხედავს, რომ წინადადება, რომელიც ჩვენ შევთავაზეთ არის უკვე ოპტიმალური და რეალური, - განაცხადა მაჭარაშვილმა.

„ქართული ოცნების“ ოფისში უმრავლესობის სხდომა პარტიის ლიდერის ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.