გიორგი კახიანი: ხელისუფლება აკეთებს მაქსიმუმს, რომ ოპოზიციასთან საარჩევნო მოდელზე შევჯერდეთ

„ამ თვალსაზრისით არაერთი კომპრომისული ნაბიჯი გადაიდგა. ფაქტობრივად ყველა იმ რისკის გასანეიტრალებლად, რასაც ოპოზიცია ხედავდა ჩვენ შესაბამისი რეგულაციები შევთავაზეთ და კომპრომისული ნაბიჯები გადავდგით“, -ამის შესახებ პარლამენტის თავმჯდომარის მოადგილემ გიორგი კახიანმა „ქრონიკას“ განუცხადა.

მისი თქმით, თუ ამ შემთხვევაშიც ოპოზიცია უარს იტყვის მოლაპარაკებათა მაგიდაზე დასხდომაზე, „ეს უკვე ერთ რამეს ცხადყოფს, რომ მათ არა აქვთ მიზნად კონკრეტულ შეთანხმებამდე მისვლა, არამედ ეს ყველაფერი თამაშია“, - აღნიშნა

მისი თქმით, ხელისუფლება აკეთებს მაქსიმუმს რომ ოპოზიციასთან საარჩევნო მოდელზე შეჯერდნენ.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.