მამუკა მდინარაძე მაჟორიტარების რაოდენობაზე: 40-ის ქვემოთ გეოგრაფიულადაც შეუძლებელია ნორმალურად დაყოფა

40 მაჟორიტარი არის ოპტიმალური ვარიანტი. 40-ის ქვემოთ გეოგრაფიულადაც შეუძლებელია ნორმალურად დაყოფა, - ამის შესახებ მმართველი გუნდის ერთ-ერთმა ლიდერმა მამუკა მდინარაძემ საარჩევნო კანონმდებლობაში განსახორციელებელ ცვლილებებზე ოპოზიციის განცხადებების საპასუხოდ განაცხადა.

„როგორ წარმოუდგენია ვინმეს საქართველოს 20 საარჩევნო ოლქად დაყოფა?! როგორ შეიძლება 4-5 რაიონი გაერთიანდეს სამაჟორიტარო ოლქში?! ვინმემ მომიყვეს და მერე შეიძლება ამ თემაზე ცოტა სერიოულად საუბარი. ისე არ შემიძლია ამაზე სერიოზულად საუბარი. ოპოზიციის მიერ გუშინ გაჟღერებული ვატიანტები ხომ იმ პრინციპის დაზღვევას ემსახურება, რასაც 40%-იანი ჩამკეტი? ჩვენ თუ ვთავაზობთ ისეთ ფორმულას, სადაც გარანტირებულად გამორიცხულია 40%-ით და ნაკლებით გარანტირებულად 76 მანდატის მიღება, მაშინ რა მნიშვნელობა აქვს მათთვის მაჟორიტარი 20 იქნება, 35 თუ 40?! 40 არის ოპტიმალური ვარიანტი. 40-ის ქვემოთ გეოგრაფიულადაც შეუძლებელია ნორმალური დაყოფა. ბარიერთან დაკავშირებით პირდაპირ მივმართავ, რამდენიც უნდათ, თავად გადაწყვიტონ - 1, 2, 3% და ის ჩაიწერება შესაბამის ნორმაში. ასეთ რეალობაში ახალი რაღაცების გამოგონება არასერიოზულია“, - განაცხადა მდინარაძემ.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.