არჩილ თალაკვაძე: წელს იქნება გარდამავალი სისტემის არჩევნები, რომელიც არის შერეულისა და პროპორციული სისტემის ნაზავი

წელს არჩევნები იქნება გარდამავალი სისტემის, რომელიც არის შერეულისა და პროპორციული სისტემის ნაზავი,- ამის შესახებ საქართველოს პარლამენტის თავმჯდომარემ სომხეთის პრემიერ-მინისტრ ნიკოლ ფაშინიანთან საუბრისას განაცხადა.

როგორც არჩილ თალაკვაძემ აღნიშნა, რომ 2024 წლიდან საქართველოში პროპორციული საარჩევნო სისტემა იქნება.

„ჩვენ გველოდება საპარლამენტო არჩევნები. ჯერ კიდევ ვატარებთ დისკუსიებს იმის შესახებ, თუ რომელი იქნება საქართველოსთვის საუკეთესო საარჩევნო სისტემა. წელს იქნება გარდამავალი სისტემა, რომელიც არის შერეული და პროპორციული სისტემის ნაზავი. ამჟამად ამ საკითხზე ცხარე პოლიტიკური დებატები გრძელდება და მოლაპარაკებებში ვართ ჩართული. საქართველო აცნობიერებს, რომ მხოლოდ რეფორმები, ინსტიტუტების გამტკიცება, დემოკრატიის გაუმჯობესება და სამართლიანი არჩევნები არის ერთადერთი გარანტია ქვეყნის გრძელვადიანი და წარმატებული განვითარებისთვის. სწორედ ამიტომ, დიდ ენერგიას ვხარჯავთ ამის მისაღწევად“, – განაცხადა არჩილ თალაკვაძემ.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.