კახა კალაძე: შეთავაზებულია ორი ვარიანტი - 100/50-ზე და 110/40-ზე, ორივე შესაძლებელია განხორციელდეს

შეთავაზებულია ორი ვარიანტი: 100/50-ზე და 110/40-ზე. ორივე შესაძლებელია განხორციელდეს. რაც შეეხება ბარიერს, აქაც პრობლემა არ არის, - ამის შესახებ „ქართული ოცნების“ გენერალურმა მდივანმა, კახა კალაძემ განაცხადა, რომელმაც კომენტარი ოპოზიციასთან მიმდინარე მოლაპარაკებებზე გააკეთა.

კახა კალაძის თქმით, ასევე ოპოზიციას შეუძლია გადაწყვიტოს - 1%-იანი საარჩევნო ბარიერი ურჩევნია, თუ 3%-იანი, თუმცა, თუ იქნება 1%-იანი ბარიერი, პარლამენტში მოხვედრის შესაძლებლობა პატარა პარტიებსაც ექნებათ.

„შეთავაზება უკვე გაკეთებულია. ჩვენი მხრიდან არაერთხელ გაკეთდა განცხადებები მზაობასთან დაკავშირებით, რათა საარჩევნო სისტემაზე შედგეს შეთანხმება და მიიღწეს კონსესუსი. შეთავაზებულია ორი ვარიანტი: 100/50-ზე და 110/40-ზე. შესაძლებელია, ორივე განხორციელდეს. რაც შეეხება ბარიერს, აქაც არ არის პრობლემა. როგორც მათ სურთ - 1%-იანი ბარიერი გაკეთდეს, თუ აქვთ სურვილი - 3%-იანი. არანაირ პრობლემას არ წარმოადგენს. თუმცა, კიდევ ერთხელ ვიმეორებ, ეს საარჩევნო სისტემა, რომელიც შეთავაზებულია ჩვენი მხრიდან, თუ იქნება 1%-იანი ბარიერი, რა თქმა უნდა, პატარა პარტიებს მიეცემათ იმის შესაძლებლობა, ხალხის მხარდაჭერის შემთხვევაში, 2020 წლის პარლამენტში მოხვდნენ“, - განაცხადა კალაძემ.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.