პაატა დავითაია: თამაშის წესები უნდა შეჯერდეს, რომ არ გაჩნდეს კითხვის ნიშნები არჩევნების ლეგიტიმაციასთან დაკავშირებით

პრინციპული მნიშვნელობა აქვს, რომ საარჩევნო სისტემაზე მოხდეს შეჯერება ყველა პოლიტიკური პარტიის. ეს არის თამაშის წესები, რომელიც უნდა იყოს შეჯერებული, რომ არ გაჩნდეს კითხვის ნიშნები არჩევნების ლეგიტიმაციასთან დაკავშირებით, - ამის შესახებ „ევროპული დემოკრატების“ ლიდერმა, პაატა დავითაიამ, საარჩევნო სისტემის ცვლილებასა და მოლაპარაკებებზე საუბრისას „დღის ქრონიკის“ ეთერში განაცხადა.

„მე არ შემიძლია გამოვიტანო კულუარები მოლაპარაკებებთან დაკავშირებით. ვფლობ ინფორმაციას დეტალურად, როგორც კოორდინატორი მთელი ოპოზიციური ფორმატის, რომელიც იკრიბება „ლეიბორისტული პარტიის“ ოფისში. ბევრი ვარიაცია განიხილება შიგნით. მნიშვნელოვანია, რომ ეს კულუარული მოლაპარაკებები ღიად დაფიქსირდეს ხელისუფლების მხრიდან. 100/50-ზე პირობითად, ან 110/40-ზე, ან 120/30-ზე, ეს არის მხოლოდ საუბრები და უნდა მიეცეს იურიდიული ფორმა. არ შეიძლება მთელ ოპოზიურ სპექტრს ჰქონდეს ერთიანი პოზიცია, ბევრი პოლიტიკური პარტიის ინტერესი ერთმანეთს არ ემთხვევა. მაგრამ ყველა თანხმდება ერთზე, რომ პროპორციულთან მიახლოებული სისტემასთან უნდა შეიქმნას“, - განაცხადა დავითაიამ.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთან და გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.