ირაკლი კობახიძე: კანონპროექტს სრული მხარდაჭერა ექნება საპარლამენტო უმრავლესობის მხრიდან

შემიძლია თამამად ვთქვა, რომ სრული მხარდაჭერა იქნება საპარლამენტო უმრავლესობის მხრიდან. ერთი შემთხვევაა, სადაც კანონპროექტზე განსხვავებული პოზიციაა დაფიქსირებული, - ამის შესახებ საპარლამენტო უმრავლესობის ერთ-ერთმა ლიდერმა, ირაკლი კობახიძემ საარჩევნო სისტემის ცვლილების შესახებ შემუშავებულ კანონპროექტთან დაკავშირებით ჟურნალისტებს განუცხადა.

მისი განმარტებით, გუშინ შეხვედრა ჰქონდა როგორც მაჟორიტარებთან, ასევე გუბერნატორებთან, რადგანაც მათ ადგილობრივი სპეციფიკა იციან და ყველა ის ფაქტორი, რომელიც ოლქების გადანაწილებასთანაა დაკავშირებული.

„მათთან გავიარეთ კონსულტაციები. ბუნებრივია, ამოსავალი წერტილი იქნება ევროსაბჭოს სტანდარტი და თანაბრობის პრინციპი. აქედან გამომდინარე, მნიშვნელოვანი იყო ეს კონსულტაციები და მასში ჩართული იყო ყველა მაჟორიტარი დეპუტატი. გუშინ სპეკულაციურად ვრცელდებოდა ინფორმაცია, რომ კახა ოქრიაშვილი არ ესწრებოდა კონსტულაციებს, რაც ტყუილია“, - განაცხადა ირაკლი კობახიძემ.

რაც შეეხება მაჟორიტარების თანხმობას, კობახიძეს განმარტებით, ამ მოდელის მთავარი მახასიათებელია ის, რომ თანაბრად მისაღებია როგორც ოპოზიციისთვის, ისე უმრავლესობის დეპუტატებისთვის, მათ შორის მაჟორიტარებისთვისაც. „მათი მიზანი იყო მაჟორიტარიზმის პრინციპის შენარჩუნება და სტაბილურობის სათანადო ხარისხით უზრუნველყოფა, რაც მიღწეულია ახალ მოდელში. აქედან გამომდინარე, რამე წინააღმდეგობა მაჟორიტარების მხრიდან არ არის“, - განაცხადა კობახიძემ.

კითხვაზე, ექნება თუ არა კანონპროექტს მხარდაჭერა, კობახიძემ განმარტა, რომ უმრავლესობის მხრიდან ამ კანონპროექტის მხარდაჭერა უზრუნველყოფილი იქნება.

„შემიძლია თამამად ვთქვა, რომ სრული მხარდაჭერა იქნება საპარლამენტო უმრავლესობის მხრიდან. ერთი შემთხვევაა, სადაც განსხვავებული პოზიციაა დაფიქსირებული, თუმცა მთლიანობაში უმრავლესობაში არსებული განწყობა გვაძლევს იმის თამამად თქმის საშუალებას, რომ ჩვენი მხრიდან უზრუნველყოფილი იქნება ამ კანონპროექტის მხარდაჭერა. კახა ოქრიაშვილსაც გავესაუბრებით და გვექნება საინტერესო დისკუსია“, - განაცხადა ირაკლი კობახიძემ.

კობახიძე დარწმუნებულია, რომ მათ მყარი უმრავლესობა ექნებათ პარლამენტში.

„საარჩევნო სისტემა არ იგებს არჩევნებს. ჩვენ არჩევნებს მოვიგებთ არა საარჩევნო სისტემით, არამედ - ამომრჩევლის მხარდაჭერით. ახალი მოდელი იძლევა შესაძლებლობას, რომ ჩვენ მყარი უმრავლესობა მივიღოთ პარლამენტში და დარწმუნებული ვართ, ამ შედეგში. ამის ყველანაირი წინაპირობა არსებობს“, - დასძინა კობახიძემ.

ახალი სარჩევნო სისტემის შესახებ საკონსტიტუციო ცვლილებების ინიცირება პარლამენტში მიმდინარე კვირას მოხდება. საქართველოს პარლამენტის თავმჯდომარის განცხადებით, ახლა პროცედურული საკითხები რჩება გასავლელი.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდა. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.