კვირიკაშვილი: ქართველებისთვის საქართველოს მოქალაქეობის დაბრუნება გამარტივდება

საქართველოს პრემიერმინისტრის გიორგი კვირიკაშვილის განცხადებით, საკონსტიტუციო რეფორმის ფარგლებში, განიხილება ინიციატივა, რომლის მიხედვითაც საქართველოს მოქალაქეებს, რომლებმაც მიიღეს სხვა ქვეყნის მოქალაქეობა, აღარ მოუწიოთ საქართველოს მოქალაქეობის დასაბრუნებლად რთული პროცედურების გავლა. ამის შესახებ გიორგი კვირიკაშვილმა დიასპორის დღისადმი მიძღვნილ ფორუმზე განაცხადა.

პრემიერმის თქმით, ეს მნიშვნელოვნად გაამარტივებს საქართველოს წარმომადგენლების აქტიურად დარჩენას საქართველოს ცხოვრებაში.

“საკონსტიტუციო რეფორმის ფარგლებში ჩვენ ვიხილავთ ინიციატივას, რომლის თანახმად, საქართველოს მოქალაქეებს, რომლებმაც მიიღეს სხვა ქვეყნის მოქალაქეობა, აღარ უნდა უწევდეთ იმ რთული პროცედურების გავლა, რომელიც სჭირდებათ იმისთვის, რომ საქართველოს მოქალაქეობა დაიბრუნონ შემდგომში. დიდი იმედი მაქვს, რომ ამ გადაწყვეტილებას მივიღებთ ახალი საკონსტიტუციო ცვლილების ფარგლებში და ეს მნიშვნელოვნად გააადვილებს ჩვენი ქვეყნის წარმომადგენლების დარჩენას აქტიურად ჩვენი ქვეყნის ცხოვრებაში”, - განაცხადა კვირიკაშვილმა.

პრემიერმა აღნიშნა, რომ ეს ინიციატივა დეპუტატ სალომე ზურაბიშვილს ეკუთვნის. მან ზურაბიშვილის მადლობა გადაუხადა.

ამასთან, კვირიკაშვილის თქმით, სპეციალური სახელმწიფო ჯილდოებით წახალისდებიან დიასპორის წარმომადგენლები, რომლებმაც განსაკუთრებული წვლილი შეიტანეს საქართველოს პოპულარიზაციის საქმეში. დიასპორის დღისადმი მიძღვნილ ფორუმზე დღეს გიორგი კვირიკაშვილმა ეკონომიკის განვითარებაში დიასპორის მიერ ინვესტიციების განხორციელების მნიშვნელობაზე ისაუბრა.

„გასული წლის განმავლობაში, ჩვენ შეგვიძლია ვთქვათ, რომ ვიხილეთ არაერთი ძალიან მნიშვნელოვანი ინვესტიცია ჩვენი დიასპორის წარმომადგენლების მხრიდან, რაც ძალიან იმედისმომცემია. ჩვენი მხრივ, რა თქმა უნდა, ხელს შევუწყობთ ჩვენი დიასპორის დაინტერესებას საქართველოში ბიზნესის წარმოებით,"- განაცხადა პრემიერმა. 

კვირიკაშვილმა აღნიშნა, რომ მთავრობა უცხოეთში ქართული ეკლესიებისა და სამრევლოების რიცხვის ზრდას და გაძლიერებას საქართველოს საპატრიარქოსთან თანამშრომლობით ხელს შეუწყობს. "ჩვენ მზად ვართ, მხარი დავუჭიროთ ნებისმიერ ინიციატივას, რომლიც დაეხმარება ქართული დიასპორის კონსოლიდაციას, მის ეფექტიან თანამშრომლობას სამშობლოსთან, საზღვარგარეთ საქართველოს პოპულარიზაციას და საერთაშორისო მხარდაჭერას“, - განაცხადა გიორგი კვირიკაშვილმა.

თბილისში, სასტუმრო „ბილტმორში“, დიასპორის დღისადმი მიძღვნილი ფორუმი მიმდინარეობს - „ძლიერი დიასპორა ერთიანი საქართველოსთვის“.

ფორუმი მიზნად ისახავს უცხოეთში მცხოვრებ თანამემამულეებთან კავშირების გაღრმავებას, ქართული დიასპორის წინაშე არსებულ გამოწვევებზე მსჯელობას და დიასპორული ორგანიზაციების მხარდასაჭერად ეფექტური გზების ძიებას.

ფორუმი ოფიციალურად გახსნა საქართველოს საგარეო საქმეთა მინისტრმა მიხეილ ჯანელიძემ. ფორუმის მონაწილეებს მისასალმებელი სიტვით მიმართეს საქართველოს პრემიერმინისტრმა და საქართველოს კათოლიკოს-პატრიარქმა.