მთავრობის გადაწყვეტილებით თვიმმართველობის კოდექსში ცვლილებები შედის

საქართველოს მთავრობამ დღევანდელ სხდომაზე მუნიციპალიტეტების გაერთიანებას მხარი დაუჭირა. დღევანდელი სხდომის ერთ-ერთი მთავარი განსახილველი თემა გორის, ამბროლაურის, მცხეთის, ოზურგეთის, ახალციხისა და ზუგდიდის მუნიციპალიტეტების შექმნასთან დაკავშირებული წინადადება იყო, რომელიც ინფრასტრუქტურის მინისტრმა ზურაბ ალავიძემ წარადგინა.

ცვლილებების შედეგად, 71 თვითმმართველი მუნიციპალიტეტის ნაცვლად საქართველოში 64 მუნიციპალიტეტი იქნება.

მთავრობის გადაწყვეტილების შესაბამისად, თვითმმართველობის შესახებ კოდექსში ცვლილებები შევა. 

როგორც პრემიერმინისტრმა მთავრობის დღევანდელ სხდომაზე განაცხადა, თვითმმართველობების შემცირებით მათი ბიუჯეტები არ შემცირდება. პრემიერის თქმით, ყველა მერიაში ჩამოყალიბდება აღმასრულებელი ორგანო, რომელიც გააერთიანებს მერის მოადგილეებს, მერის სამსახურის უფროსებს და ამით თავიდან იქნება აცილებული ერთპიროვნული გადაწყვეტილებები. მისი თქმით, საკრებულოებს მიეცემათ დემოკრატიული კონტროლის განხორციელების რეალური ბერკეტები.

მთავრობის სხდომის დასრულების შემდეგ, ჟურნალისტებთან კომენტარი გააკეთა რეგიონული განვითარებისა და ინფრასტრუქტურის მინისტრმა ზურაბ ალავიძემ. მისი განცხადებით, რეფორმის მიზანია "მივიღოთ უფრო ეფექტიანი მართვის მოდელი, რათა უფრო ოპერატიულად მოგვარდეს მუნიციპალიტეტებში არსებული პრობლემები." მინისტრის თქმით, ცვლილებების თანახმად, იზრდება საკრებულოების ფუნქციები და გადაწყვეტილების მიღების პროცესში მოქალაქეთა ჩართულობა.

"იგეგმება კოლეგიალური ორგანოების შექმნა მერიებში, რომ ერთპიროვნულად გადაწყვეტილება არ იყოს მიღებული. ასევე, საკრებულოების როლი იზრდება გამომდინარე იქიდან, რომ მერი სამსახურის უფროსების და მოადგილეების კანდიდატურებს საკრებულოებს წარუდგენს", - განაცხადა ინფრასტრუქტურის მინისტრმა.

ალავიძის განმარტებით, თვითმმართველობებში არასამეწარმეო არამომგებიანი იურიდიული პირების შექმნის მექანიზმების მოსაწესრიგებლად, სამინისტრო ცვლილებათა მეორე პაკეტის მომზადებასაც გეგმავს. ასევე მოიაზრება თვითმმართველობებში ტერიტორიული ორგანოების შექმნაც.

"დარგების მიხედვით იქნება თითო ა(ა)იპ, ანუ შევზღუდავთ დუბლირებულ სერვისებს. ეს მნიშვნელოვანი იქნება ხარჯების დაზოგვის კუთხით. შემდგომი პაკეტისთვის ჩვენ ასევე ტერიტორიულ ორგანოებს შემოვიღებთ და ზუსტად ეს იქნება ჩვენი თვითმმართველობის რეფორმის გაგრძელება და უფრო მეტი დეცენტრალიზაცია", - განაცხადა ზურაბ ალავიძემ.

შვიდ თვითმმართველ ქალაქსა და 7 სათემო მუნიციპალიტეტში საკრებულოებმა უკვე დაუჭირეს მხარი რეგიონული განვითარებისა და ინფრასტრუქტურის სამინისტროს ინიციატივას თვითმმართველი ქალაქებისა და სათემო მუნიციპალიტეტების გაერთიანების შესახებ. 29 მაისს, არასამთავრობო ორგანიზაციებმა პრემიერ გიორგი კვირიკაშვილს მიმართეს და თვითმმართველი ქალაქების გაუქმების შესახებ მთავრობის ინიციატივასთან დაკავშირებით შეხვედრა სთხოვეს. ჯერჯერობით უცნობია, შეხვდება თუ არა პრემიერი ორგანიზაციებს.