ლაშა ნაცვლიშვილი სუს-ის ოპერაციაზე: სახელმწიფომ პრაქტიკულად უზადოდ იმოქმედა

საუკუნეებია რუსეთის სპეცსამსახურები, სხვა დიდი სახელმწიფოების მსგავსად, საკუთარი სტრატეგიული მოწინააღმდეგეების და მოღალატეების ლიკვიდაციას ახდენენ, - ამის შესახებ ლაშა ნაცვლიშვილმა „დღის ქრონიკის“ ეთერში სუს-ის მიერ სავარაუდოდ გიორგი გაბუნიას მკვლელობის მომზადებისთვის დაკავებული რუსეთის მოქალაქის საქმეზე საუბრისას განაცხადა.

„ქართული ოცნების“ საზოგადოებასთან ურთიერთობის კონსულტანტის თქმით, ასეთი მიდგომის ნათელი მაგალითები არის ლიტვინენკოს, სკრიპალების, ზელიმახ ხანგოშვილის საქმეები. მან ისიც აღნიშნა, რომ სახელმწიფომ ამ შემთხვევაში პრაქტიკულად უნაკლოდ იმოქმედა, რითაც საზოგადოებას ბევრი პრობლემა ააცილია თავიდან.

„ჩვენ შეიძლება არ ვისაუბროთ და ვერც ვისაუბრებთ სავარაუდო შემკვეთებზე, მაგრამ არავის გაუუქმებია ლათინური მარადიული კითხვა: ვის აწყობდა ეს დანაშაული. არაფერი გარდა პოზიტივისა სახელმწიფოს არ ჩაუდენია. მან მოახერხა და მომზადების სტადიაზე აღკვეთა უმძიმესი დანაშაული. დაადგინა, ოპერატიულ კონტროლზე აიყვანა და გააუნებელყო პოტენციური მკვლელი, ისე რომ არ დააფრთხო იგი ისეთი მოქმედებებით, რომელთა გამოც ის ფსკერზე დაწვებოდა. და ამის გამოც კი, როდესაც სახელმწიფომ პრაქტიკულად უზადოდ იმოქმედა, ნიაღვარი არ წყდება კომენტარების, რომ რაღაც სინქრონში არიან ქართველი სამართალდამცველები რუსებთან. წარმოიდგინეთ, ეს ოპერაცია იმ წარმატებით, ანუ რაც იყო დაგეგმილი, რომ განხორციელებულიყო, მე მგონი მოდელირებული „ქრონიკის“ სერიალს მივიღებდით და მისი შინაარსი ის იქნებოდა, რისი დანგრევასაც 2011 წლის 7 ნოემბრიდან ცდილობენ, რომ პუტინთან დაკავშირებულმა ოლიგარქმა ბიძინა ივანიშვილმა ჟურნალისტ გიორგი გაბუნიას თავი მიართვა თავის ბატონ პუტინს“, - განაცხადა ნაცვლიშვილმა.

ნიკა გვარამიას ინფორმაციით, რამზან კადიროვის დაკვეთით გიორგი გაბუნიას მკვლელობა იგეგმებოდა.

15 ივნისს სუს-მა დაადასტურა, რომ შეკვეთით განზრახ მკვლელობის მომზადების ფაქტზე დაწყებული გამოძიების ფარგლებში რუსეთის მოქალაქეა დაკავებული.