ანდრიუს კუბილიუსი საკონსტიტუციო ცვლილებების პირველი მოსმენით მიღებას მიესალმება

ევროპარლამენტარი ანდრიუს კუბილიუსი საარჩევნო სისტემასთან დაკავშირებული საკონსტიტუციო ცვლილებების პირველი მოსმენით მიღებას მიესალმება.

„მივესალმები საარჩევნო სისტემის ცვლილებასთან დაკავშირებით კანონპროექტის პირველი მოსმენით მიღებას. ვიმედოვნებ, 8 მარტის შეთანხმება სრულად განხორციელდება და ყველა მხარეს ექნება შესაძლებლობა, მონაწილეობა მიიღოს შემდგომ განხილვებში. ეს არის გზა დემოკრატიის სიმწიფისკენ საქართველოში, პოლიტიკური პატიმრების გარეშე“, - წერს ლიეტუვის ყოფილი პრემიერი.

I welcome 1st reading on #Georgia electoral reform with 136 votes in favour. Hope 8 March agreement will be fully implemented, and all opposition parties will be able to participate in further readings. This is the way to maturity of democracy in 🇬🇪 without political prisoners!

— Andrius Kubilius (@KubiliusA) June 22, 2020

საკონსტიტუციო ცვლილებებს პარლამენტში ხვალ, მეორე მოსმენით უყრიან კენჭს.

ნაციონალური მოძრაობის“ ულტიმატუმი კვლავ ძალაშია, „ევროპული საქართველო“ კი, რომელმაც ცვლილებებს პირველ მოსმენაზე გუშინ მხარი დაუჭირა, მეორე მოსმენაზე დასწრებასა და კენჭისყრაში მონაწილეობას მხოლოდ იმ შემთხვევაში აპირებს, თუ მანამდე გიორგი რურუა გათავისუფლდება.

რაც შეეხება „დამოუკიდებელ დეპუტატებს’’, მარიამ ჯაშის განცხადებით, მათი ფრაქციისგან ამ პროექტს სრული მხარდაჭერა აქვს. მმართველ გუნდში აცხადებენ, რომ „ევროპული საქართველოსა’’ და „ნაციონალური მოძრაობის’’ მხარდაჭერის გარეშეც, ცვლილებების მისაღებად, საკმარისი ხმები გროვდება.

საკონსტიტუციო ცვლილებებს პირველი მოსმენით კენჭი გუშინ უყარეს. კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში 120 წევრს პროპორციული და 30 წევრს მაჟორიტარული საარჩევნო სისტემით აირჩევენ.