ევროპარლამენტარი მარინა კალიურანდი და საქართველოს საკითხზე მომხსენებელი სვენ მიქსერი განცხადებას ავრცელებენ

ევროპარლამენტარი მარინა კალიურანდი და საქართველოს საკითხზე მომხსენებელი სვენ მიქსერი საქართველოს პარლამენტის მიერ საკონსტიტუციო ცვლილებების პირველი მოსმენით დამტკიცების შესახებ ერთობლივ განცხადებას ავრცელებენ.

„გუშინ საქართველოს პარლამენტმა ახალ საარჩევნო სისტემასთან დაკავშირებული საკონსტიტუციო ცვლილებები პირველი მოსმენით დაამტკიცა.150 პარლამენტარიდან ცვლილებებს მხარი 136-მა დაუჭირა და ეს პოზიტიური სიგნალია, რადგან ფართო კონსენსუსის მიღწევას ამტკიცებს.

ჩვენ მოვუწოდებთ ყველა მხარეს, 8 მარტის შეთანხმების მონაწილეებს, გამოიყენონ ეს პოზიტიური ბიძგი, რადგან ეს დაეხმარება საქართველოს პოლიტიკური გარემოს დეპოლარიზაციაში და უზრუნველყოფს, რომ მოქალაქეების დემოკრატიული ნება სათანადოდ იყოს გამოხატული შემდეგ საპარლამენტო არჩევნებზე.

კიდევ ორი მოსმენა უნდა გაიმართოს გეგმის მიხედვით, 23 და 29 ივნისს, შემდეგ კი პირველ და 2 ივლისს გაიმართება კენჭისყრა საარჩევნო სისტემაზე, რათა გათვალისწინებული იყოს ეუთოს დემოკრატიული ინსტიტუტებისა და ადამიანის უფლებათა ოფისის რეკომენდაციები“, - ნათქვამია მარინა კალიურანდისა და სვენ მიქსერის ერთობლივ განცხადებაში.

საკონსტიტუციო ცვლილებებს პარლამენტში ხვალ, მეორე მოსმენით უყრიან კენჭს.

ნაციონალური მოძრაობის“ ულტიმატუმი კვლავ ძალაშია, „ევროპული საქართველო“ კი, რომელმაც ცვლილებებს პირველ მოსმენაზე გუშინ მხარი დაუჭირა, მეორე მოსმენაზე დასწრებასა და კენჭისყრაში მონაწილეობას მხოლოდ იმ შემთხვევაში აპირებს, თუ მანამდე გიორგი რურუა გათავისუფლდება.

რაც შეეხება „დამოუკიდებელ დეპუტატებს’’, მარიამ ჯაშის განცხადებით, მათი ფრაქციისგან ამ პროექტს სრული მხარდაჭერა აქვს. მმართველ გუნდში აცხადებენ, რომ „ევროპული საქართველოსა’’ და „ნაციონალური მოძრაობის’’ მხარდაჭერის გარეშეც, ცვლილებების მისაღებად, საკმარისი ხმები გროვდება.

საკონსტიტუციო ცვლილებებს პირველი მოსმენით კენჭი გუშინ უყარეს. კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში 120 წევრს პროპორციული და 30 წევრს მაჟორიტარული საარჩევნო სისტემით აირჩევენ.