ლევან კობერიძე საკონსტიტუციო ცვლილებებზე: ბევრჯერ დავადასტურეთ მხარდაჭერა და იმავეს ვიზამთ მეორე მოსმენის დროსაც

ფრაქცია „დამოუკიდებელმა დეპუტატებმა“, დანარჩენმა ორმა ფრაქციამ და ასევე უფრაქციო დეპუტატებმა მთელ ამ მოვლენებში მნიშვნელოვანი როლი ითამაშეს და რეალურად გამოიკვეთა, ვინ როგორი პასუხისმგებლობით უდგება საკითხებს, - ამის შესახებ საპარლამენტო ფრაქცია „დამოუკიდებელი დეპუტატების“ წევრმა, ლევან კობერიძემ პარლამენტის სხდომაზე განაცხადა.

მისი თქმით, საკონსტიტუციო ცვლილებებისადმი მხარდაჭერა ბევრჯერ დაადასტურეს და იმავეს იზამენ მეორე მოსმენის დროსაც.

„ძალიან სამწუხარო გამოცდილება გვაქვს უახლესი წარსულიდან, „ქართული ოცნების“ მხრიდან პროპორციული არჩევნების ჩაგდებასთან დაკავშირებით, როდესაც პრაქტიკულად მოსახლეობის და არა მხოლოდ მოსახლეობის „გადაგდება“ მოხდა. მეორე მხრივ, დღეს ჩვენ აქ ვხედავთ, რომ თავისივე ხელმოწერილ დოკუმენტს არ ასრულებენ ადამიანები. თუ მმართველ გუნდს ისე გინდათ წარმოაჩინოთ, რომ 116 ხმა გარანტირებულია, თქვენი მხრიდან არაფერია გარანტირებული, ხოლო ჩვენი მხრიდან, ნამდვილად ვიცით, მხარდაჭერა გარანტირებულია. ჩვენი მხარდაჭერა ამ ცვლილებებისადმი ბევრჯერ დავადასტურეთ და იმავეს ვიზამთ ახლა, მეორე მოსმენის დროსაც. მიუხედავად იმისა, რომ დარწმუნებული ვარ, რომ ეს ცვლილებები გავა, ეს ვერ იქნება „ქართული ოცნებისთვის“ ნამუსის მოწმენდის მცდელობა, რადგან თქვენ, პროპორციული არჩევნები, რაზეც იყო მთლიანად საერთო სახალხო შეთანხმება, ჩააგდეთ და ახლა იმის მცდელობა, რომ წარმოაჩინოთ თავი ძალიან პასუხისმგებლიან პოლიტიკურ ძალად, სამწუხაროდ, არ გამოგივათ“, - განაცხადა ლევან კობერიძემ.