გედევან ფოფხაძე: თუ ვიღაცას მიაჩნია, რომ საკონსტიტუციო ცვლილებები არ არის სწორი, სჯობს იყოს დარბაზში და თავის პოზიციას აფიქსირებდეს, ვიდრე ბოიკოტს აცხადებდეს და რაღაც წინაპირობებს აყენებდეს

დღეს ამ დარბაზში ყოფნა ყველა დეპუტატის პირდაპირი ვალია. თუ ვიღაც არ იზიარებს ამ პოზიციას და მიაჩნია, რომ საკონსტიტუციო ცვლილებები არ არის სწორი, სჯობს იყოს დარბაზში და თავის პოზიციას აფიქსირებდეს, ვიდრე ამ პროცესს ბოიკოტს უცხადებდეს და რაღაც წინაპირობებს აყენებდეს - მის შესახებ დამოუკიდებელმა დეპუტატმა, გედევან ფოფხაძემ პარლამენტის პლენარულ სხდომაზე განაცხადა, სადაც საკონსტიტუციო ცვლილებებს მეორე მოსმენით განიხილავენ.

ფოფხაძის განცხადებით, დღეს პარლამენტმა ქართველ ხალხს უნდა დაანახოს, რომ ქართული პოლიტიკური სპექტრი ქართული სახელმწიფოს ინტერესს უფრო მაღლა აყენებს, ვიდრე პოლიტიკურ კონიუნქტურას.

„დღეს არავისთან მიმართებაში არაფერი ნიშნის მოსაგები არ არის, არც სამადლობელია არაფერი. გადაწყვეტილება უნდა მიგვეღო ხალხის ინტერესებიდან გამომდინარე და ამიტომ, მთავარი გმირი და პერსონაჟი, ვინც ჰყავს საარჩევნო პროცესს, არის საქართველოს მოქალაქე, ქართველი ხალხი და ამიტომ პასუხისმგებლობაც მათთან მიმართებით უნდა იყოს გამომჟღავნებული. არ შეიძლება, ამომრჩეველი წინასაარჩევნოდ იყოს გაურკვევლობაში და არ იცოდეს, რა წესით ხდება ხელისუფლების არჩევა. ეს ხელისუფლების ლეგიტიმაციასაც კითხვის ნიშნის ქვემოთ აყენებს. ხაზგასმით მინდა ჩვენს ყველა კოლეგას ვუთხრა, რომ დღეს ის არ იღებს პარტიულ გადაწყვეტილებას, არ იღებს გადაწყვეტილებას, რომელიც კარგია ოპოზიციისთვის ან ხელისუფლებისთვის, იღებს გადაწყვეტილებას, რომელიც ამ ვითარებაში არის პოლიტიკური კონსენსუსი და შესაბამისად, ყველას კარგად უნდა ჰქონდეს გათვიცნობიერებული ის, რომ ჩვენ ერთმანეთის წინაშეც გვაქვს ვალდებულება და პასუხისმგებლობა და პირველ რიგში, ჩვენი ხალხის წინაშე. ვიღებთ გადაწყვეტილებას, ვაჭერთ „მწვანეს“ საკონსტიტუციო ცვლილებებთან დაკავშირებით და ამით იმ პოლიტიკურ გზავნილს ვქმნით საზოგადოების წინაშე, რომელიც ამ ქვეყნის მშვიდობიანი და სტაბილური განვითარების წინაპირობაა. დიახ, „ქართული ოცნება“ არ იყო მართალი, როდესაც ის ცვლილებები ჩავარდა და არ მოხდა თავდაპირველად საკონსტიტუციო ცვლილებების განხორციელება, მაგრამ დღეს ჩვენ ყველას გვაქვს პასუხისმგებლობა, რომ ეს შეიცვალოს და იყოს მიღებული ერთიანი გადაწყვეტილება. ამ დარბაზში ყოფნა დღეს ყველა დეპუტატის პირდაპირი ვალია, თუ ვიღაც არ იზიარებს ამ პოზიციას და მიაჩნია, რომ საკონსტიტუციო ცვლილებები არ არის სწორი, სჯობს იყოს დარბაზში და თავის პოზიციას აფიქსირებდეს, ვიდრე ამ პროცესს ბოიკოტს უცხადებდეს და რაღაც წინაპირობებს აყენებდეს. ყველა უნდა ვიყოთ ერთიანი, ჩვენი ხალხის და ჩვენი ქვეყნის სტაბილური და მშვიდობიანი განვითარების წინაშე. ეს არის მთავარი პოლიტიკური გზავნილი, რომელიც ქართულმა პარლამენტმა დღეს უნდა გააკეთოს და ამ ერთიანობით ჩვენ უნდა დავანახოთ ქართველ ხალხს, რომ ქართული პოლიტიკური სპექტრი ქართული სახელმწიფოს ინტერესს უფრო მაღლა აყენებს, ვიდრე პოლიტიკურ კონიუნქტურას“, - განაცხადა ფოფხაძემ.

საქართველოს კონსტიტუციაში ცვლილებების შეტანას დღეს პარლამენტში, პლენარულ სხდომაზე მეორე მოსმენით უყრიან კენჭს. საკონსტიტუციო ცვლილებებს პირველი მოსმენით კენჭი 21 ივნისს უყარეს.

კანონპროექტის მიხედვით, 2020 წლის საპარლამენტო არჩევნები შერეული სისტემით ჩატარდება, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

„ნაციონალური მოძრაობა“ საკონსტიტუციო ცვლილებების განხილვაში არ მონაწილეობდა.

სხდომაზე იყვნენ „ევროპული საქართველოს“ წევრები. პარტიის ლიდერების თქმით, პროექტის მეორე და მესამე მოსმენით განხილვაში მათი მონაწილეობა იმაზე იქნება დამოკიდებული, გათავისუფლდება თუ არა გიორგი რურუა.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.