ირაკლი კობახიძე: კენჭისყრაში „ევროპული საქართველოს“ და „ნაცმოძრაობის“ არმონაწილეობა მათი უპრინციპობის კიდევ ერთი გამოვლინება იყო

დღევანდელ კენჭისყრაში „ევროპული საქართველოს“ და „ნაციონალური მოძრაობის“ არმონაწილეობა იყო მათი უპრინციპობისა და არათანმიმდევრულობის კიდევ ერთი გამოვლინება, - ამის შესახებ ტელეკომპანია „იმედის“ გადაცემაში „არენა“ საპარლამენტო უმრავლესობის წევრმა, ირაკლი კობახიძემ განაცხადა.

„ჯერ კიდევ პირველ მოსმენამდე ელჩებმა ძალიან მკაფიოდ და ერთმნიშვნელოვნად მოუწოდეს ყველა პოლიტიკურ პარტიას, მხარი დაეჭირათ საკონსტიტუციო ცვლილებებისთვის. პირველი მოსმენის დროს ერთ-ერთმა რადიკალურმა პარტიამ, „ევროპულმა საქართველომ“ მიიღო მონაწილეობა კენჭისყრაში, რითაც ელჩების მოწოდება სანახევროდ შეასრულა, თუმცა დღეს არც „ევროპულმა საქართველომ“ და არც „ნაციონალურმა მოძრაობამ“ კენჭისყრაში მონაწილეობა არ მიიღეს. ეს ნიშნავს იმას, რომ ისინი არად დაგიდევენ ელჩების ასეთ მოწოდებას. ეს კიდევ ერთხელ მიანიშნებს იმაზე, რომ ისინი რეალურად არიან ანტიდასავლური ძალა, რომელსაც არ აინტერესებს, რას ფიქრობს მათზე დასავლეთი. მათ აქვთ ერთადერთი ინტერესი - განახორციელონ თავისი სუბიექტური პოლიტიკური ზრახვები და ამისთვის ისინი მზად არიან ნებისმიერი უპრინციპო ნაბიჯისთვის. მათი დღევანდელი ნაბიჯი იყო უპრინციპობისა და არათანმიმდევრულობის კიდევ ერთი გამოვლინება. მოხვიდე პირველ მოსმენაზე, შემდეგ არ მოხვიდე მეორეზე - ეს მათ კომიკურ მდგომარეობაში აგდებს. ეს დამატებით აზიანებს მათ ისედაც შელახულ იმიჯს“, - განაცხადა კობახიძემ.

პარლამენტის პლენარულ სხდომაზე საკონსტიტუციო ცვლილებებს კენჭი მეორე მოსმენით უყარეს. კანონპროექტს მხარი დაუჭირა 115-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 119-მა დეპუტატმა. „ნაციონალურმა მოძრაობამ“ და „ევროპულმა საქართველომ“ კენჭისყრაში მონაწილეობა არ მიიღეს და ამის მიზეზად გიორგი რურუას პატიმრობაში დარჩენა დაასახელეს.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.