ირაკლი კობახიძე მიიჩნევს, რომ არჩევნების შედეგები რადიკალური ოპოზიციისთვის განსაკუთრებით მძიმე იქნება

8 მარტის შეთანხმებაში შავით თეთრზე წერია, რომ თითოეულმა პოლიტიკურმა პარტიამ მხარი უნდა დაუჭიროს საკონსტიტუციო ცვლილებებს. ამის შესახებ ირაკლი კობახიძემ „იმედის“ გადაცემაში „არენა“ განაცხდა. მისი თქმით, „ნაციონალური მოძრაობა“ და „ევროპული საქართველო“ საკონსტიტუციო ცვლილებებზე კენჭისყრაში მონაწილეობაზე უარის თქმით, შეთანხმებას ცალსახად არღვევენ.

„ისინი პირდაპირ და უხეშად არღვევენ 8 მარტის შეთანხმებას. აქედან გამომდინარე, მათ ნაბიჯებს არ აქვს გამართლება და ეს არის პირდაპირ უდიერი დამოკიდებულების დამოკიდებულება ელჩების მიმართ. შესაბამისად, ბუნებრივია ელჩებს ექნებათ ამაზე ძალიან მკაცრი რეაქცია“, - განაცხადა კობახიძემ.

მისივე თქმით, კენჭისყრაში მონაწილეობაზე უარის თქმა ოპოზიციის ამ ნაწილის ისედაც შელახულ რეპუტაციას კიდევ უფრო გააფუჭებს, რაც საკმაოდ ცუდია ქვეყანაში დემოკრატიული პროცესების ჯანსაღი განვითარებისთვის. კობახიძე აღნიშნავს, რომ ოპოზიცია უარს აცხადებს იმ ცვლილებების მიღებაზე, რომლებიც თვითონ მოითხოვეს, რაც მათი არათანმიმდევრულობის კიდევ ერთი მაგალითია.

„ისინი აბსოლუტურად აჭრილები არიან, ვერაფერზე თანხმდებიან, ერთმანეთთან აქვთ დაპირისპირება. ერთად სხედან ე.წ. პროდასავლური და თვითაღიარებული პრორუსული პოლიტიკური ძალები. ეს ყველაფერი მიანიშნებს იმაზე, რომ ძალიან მძიმე მდგომარეობაა მთლიანობაში ოპოზიციაში, რაც თავის გამოხატულებას ჰპოვებს საბოლოო ჯამში ოქტომბრის არჩევნების შედეგებზე. ძალიან მძიმე იქნება შედეგები, განსაკუთრებით რადიკალური ოპოზიციისთვის. სწორედ იმის გამო რომ ისინი არიან, წარსულ რომ თავი დავანებოთ, ძალიან არათანმიმდევრულები და ავლენენ მუდმივ უპრინციპობას“, - მიიჩნევს კობახიძე.

კობახიძეს ეჭვი არ ეპარება, რომ პარლამენტი კანონპროექტს მესამე მოსმენით მიიღებს და მას 116 დეპუტატის მხარდაჭერა ექნება.

„წარმოიდგინეთ, რომ რომელიმე ამ 116 დეპუტატიდან უცბად მხარს არ უჭერს ამ ცვლილებებს. ეს იქნებოდა პირდაპირ და ღია გარიგებაში შესვლა „ნაციონალურ მოძრაობასთან“ და ალბათ ასეთ რამეს ვერც ერთი დეპუტატი ვერ გარისკავს. აქედან გამომდინარე, ჩვენი მოლოდინი არის, რომ 116-ვე დეპუტატის მხარდაჭერა იქნება უზრუნველყოფილი კანონპროექტის მიმართ. შესაბამისად, ჩვენ ვერ ვხედავთ რაიმე არსებით რისკს კანონპროექტის მიღებასთან დაკავშირებით“, - განმარტავს კობახიძემ.

პარლამენტის პლენარულ სხდომაზე საკონსტიტუციო ცვლილებებს კენჭი მეორე მოსმენით უყარეს. კანონპროექტს მხარი დაუჭირა 115-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 119-მა დეპუტატმა. „ნაციონალურმა მოძრაობამ“ და „ევროპულმა საქართველომ“ კენჭისყრაში მონაწილეობა არ მიიღეს და ამის მიზეზად გიორგი რურუას პატიმრობაში დარჩენა დაასახელეს.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.