ნუკრი ქანთარია: ოპოზიციის ველი ასეთი უსუსური არასდროს ყოფილა

საინტერესო გახლავთ რურუას ციხიდან ოპოზიციის მიმართ მითითებები: მარჯვნივ წადით, მარცხნივ წადით, შედით დარბაზში, კენჭისყრაში მონაწილეობა მიიღეთ, მაგრამ მე მგონი, მას არ უჯერებენ, - ამის შესახებ უმრავლესობის წევრმა, ნუკრი ქანთარიამ „POSTV“-ის ეთერში განაცხადა.

„ლოგიკას თუ მივყვებით, ოპოზიციას „საყვირლად“ რურუას ციხეში ყოფნა აწყობს, წესით ასე უფრო ჩანს და იქედან უფრო შეუძლიათ სარგებლის მიღება. რასაც ახლა მე ვუყურებ, ოპოზიცია ძალიან უსუსურად გამოიყურება, ოპოზიციის ველი ასეთი უსუსური არასდროს ყოფილა. შეიძლება ეს უსუსურობა შემდეგ რაღაც აგრესიაში გადაიზარდოს. ახლა მათი სურვილია ხელისუფლებაში მოსვლა, ძველი ცოდვების ჩამორეცხვა, მაგრამ ხალხს კარგად ახსოვს ვინ რა იყო, ყველა სახე არის გაცვეთილი, ასე რომ, სხვა რა გზას უნდა ეწიონ, არ ვიცი“, - აღნიშნა ნუკრი ქანთარიამ.

გიორგი რურუამ Facebook-ზე განცხადება გაავრცელა და თანამოაზრეებს საკონსტიტუციო ცვლილებების მესამე მოსმენაში მონაწილეობისკენ მოუწოდა.

23 ივნისს პარლამენტის პლენარულ სხდომაზე საკონსტიტუციო ცვლილებებს კენჭი მეორე მოსმენით უყარეს. კანონპროექტს მხარი დაუჭირა 115-მა დეპუტატმა, 3-მა კი წინააღმდეგ მისცა ხმა. რეგისტრაცია გაიარა 119-მა დეპუტატმა. „ნაციონალურმა მოძრაობამ“ და „ევროპულმა საქართველომ“ კენჭისყრაში მონაწილეობა არ მიიღეს და ამის მიზეზად გიორგი რურუას პატიმრობაში დარჩენა დაასახელეს.

ოპოზიცია და ხელისუფლება 8 მარტს 2020 წლის არჩევნების 120/30-ზე მოდელით ჩატარებაზე შეთანხმდნენ. შესაბამის შეთანხმებას მხარეებმა აშშ-ის ელჩის რეზიდენციაში გამართულ შეხვედრაზე მიაღწიეს.

რა დოკუმენტებს მოაწერეს ხელი აშშ-ის საელჩოში გამართული შეხვედრის მონაწილეებმა, წაიკითხეთ ამ ბმულზე.