ლაშა დარსალია იმედოვნებს, რომ ოკუპანტების მიერ უკანონოდ დაკავებულ მოქალაქეებს ქართულ მხარეს უმოკლეს ვადაში გადასცემენ

საოკუპაციო რეჟიმები ვითარების დამძიმებას ცდილობენ ხოლმე, რათა ასეთი საკითხებით ივაჭრონ. ამის შესახებ საგარეო საქმეთა მინისტრის მოადგილე ლაშა დარსალიამ გადაცემაში „დღის კურიერი“ განაცხადა., როდესაც საოკუპაციო ძალების მიერ საქართველოს მოქალაქეების დაკავების თემას შეეხო.

ლაშა დარსალია იმედოვნებს, რომ საერთაშორისო პარტნიორების აქტიურობით, უახლოეს დღეებში ჩაინიშნება ინციდენტების პრევენციისა და მათზე რეაგირების ფარგლებში შეხვედრა.

როდის უნდა ველოდოთ უკანონოდ დაკავებულების გათავისუფლებას, ამ საკითხზე საუბრისას ლაშა დარსალიამ აღნიშნა, რომ ამ მხრივ ყველა მექანიზმი ამუშავებული.

„უახლოეს მომავალში უნდა გაიმართოს ინციდენტების პრევენციისა და მათზე რეაგირების ფარგლებში შეხვედრები, რაც უფრო ნათელს მოჰფენს ამ საკითხს. დარწმუნებული ვართ და იმედი გვაქვს, რომ გადმოცემა მოხდება რაც შეიძლება მალე და ამისთვის მნიშვნელოვანია ყველა მექანიზმის ამოქმედება“, - განაცხადა ლაშა დარსალიამ.

მისივე თქმით, ზაზა გახელაძის მდგომარეობა დამაკმაყოფილებელია.

„დღეს მთავარი ამოცანაა, რომ ჩვენი მოქალაქეები რაც შეიძლება სწრაფად გადმოგვცენ. შექმნილი ვითარება კიდევ ერთხელ ადასტურებს, რა ვითარებაა ოკუპირებულ ტერიტორიებზე ჰუმანიტარული და ადამიანის უფლებათა თვალსაზრისით. იქ რაიმე სახის სამართლიან პროცესზე საუბარი აბსურდია“, - განაცხადა ლაშა დარსალიამ.

ქართული მხარის ინიციატივით, ეუთო-ს მუდმივი საბჭოს სხდომაზე საოკუპაციო ძალების მიერ საქართველოს მოქალაქის, ზაზა გახელაძის დაჭრისა და უკანონო დაკავების თაობაზე იმსჯელეს.

ეუთო-ში საქართველოს მუდმივმა წარმომადგენელმა, ქეთევან ციხელაშვილმა აღნიშნა, რომ ზაზა გახელაძის შემთხვევა კიდევ ერთხელ ადასტურებს უკანონო დაკავებებისა და თავისუფალი გადაადგილების შეზღუდვის პრაქტიკის შეწყვეტის აუცილებლობას. მან საბჭოს წევრებს მიაწოდა ინფორმაცია საოკუპაციო რეჟიმის მიერ ბოლო პერიოდში დაკავებულ კიდევ ორ მოქალაქეზე - გენადი ბესტაევსა და ხვიჩა მღებრიშვილზე.

ოკუპანტებმა ზაზა გახელაძე 11 ივლისს დაჭრეს და დააკავეს. ოჯახის წევრების ინფორმაციით, ის ახალგორიდან ცხინვალში გადაიყვანეს. ფეხში დაჭრილი ზაზა გახელაძე ცხინვალის საავადმყოფოში, კარანტინშია მოთავსებული. საოკუპაციო ხაზთან მომხდარ ინციდენტთან დაკავშირებით ინფორმირებულია ევროკავშირის სადამკვირვებლო მისია. ამოქმედებულია ცხელი ხაზი.

რუსეთის საგარეო საქმეთა სამინისტრომ გაავრცელა განცხადება, რომელშიც მომხდარზე აშშ-ის რეაგირება გააკრიტიკა და 11 ივლისის მოვლენები აღწერა. უწყებაში ამტკიცებენ, რომ საქართველოს 33 წლის მოქალაქე ნახევრადავტომატური იარაღით იყო შეიარაღებული და ე.წ. სამხრეთ ოსეთის საზღვარი გადაკვეთა. და მას შემდეგ, რაც რუსმა მესაზღვრეებმა მისი დაკავება სცადეს, 10-მდე გასროლა განახორციელა, საპასუხო სროლის შედეგად კი ის ფეხში მსუბუქად დაჭრეს. რუსეთის საგარეო საქმეთა სამინისტროში ამტკიცებენ, რომ დაკითხვისას მან აღიარა, რომ ოკუპირებული ცხინვალის რეგიონის ე.წ. სახელმწიფო საზღვარი მიზანმიმართულად გადაკვეთა.