საერთაშორისო ორგანიზაციები მუხტარლის საქმეზე კვირიკაშვილს მიმართავენ

აზერბაიჯანელი ჟურნალისტისა და აქტივისტის აფგან მუხტარლის საქმესთან დაკავშირებით, ადამიანის უფლებებზე მომუშავე საერთაშორისო ორგანიზაციები პრემიერმინისტრ გიორგი კვირიკაშვილს წერილობით მიმართავენ და ჟურნალისტის საქმის გამოძიებისკენ მოუწოდებენ. წერილი 7 ივნისით თარიღდება. ინფორმაციას სააგენტო ipn ავრცელებს.

ერთობლივ წერილში პრესის თავისუფლებისა და ადამიანის უფლებების დაცვის ორგანიზაციები "ღრმა აღშფოთებას გამოხატავენ აფგან მუხტარლის გატაცებასთან დაკავშირებით." 

"აღნიშნული შემაშფოთებელი მოვლენა არა მხოლოდ ქმნის აფგან მუხტარლის წამებისა და გრძელვადიანი პატიმრობის შესაძლებობას, არამედ ასევე იქმნება პრეცედენტი, რომელიც საფრთხეს წარმოადგენს საქართველოში მცხოვრები აზერბაიჯანელების უსაფრთხოებისთვის, რომლებმაც თავშესაფარი საქართველოში იპოვეს. ბოლო წლების განმავლობაში უამრავი დამოუკიდებელი ჟურნალისტი, უფლებადამცველი და სამოქალაქო საზოგადოების სხვა აქტივისტი აზერბაიჯანიდან გაიქცა, სადაც რეპრესიების ობიექტი იყო. ისინი იმედოვებდნენ, რომ საქართველოში უსაფრთხო თავშესაფარს იპოვნიდნენ, მაგრამ ახლა ისინი მუდმივი შიშის ქვეშ ცხოვრობენ, რომ მათ უკანონოდ გადაიყვანენ თავიანთ ქვეყანაში“, - ნათქვამია წერილში. 

აფგან მუხტარლის გატაცება შავი ლაქაა საქართველოს რეპუტაციაზე, რომელიც კავკასიის რეგიონში ადამიანის უფლებების უზრუნველყოფის კუთხით ლიდერი ქვეყანაა. აზერბაიჯანის ხელისუფლება ულმობელად ებრძვის მათ, ვინც მას აკრიტიკებს. როგორც ამგვარი რეპრესიული სახელმწიფოს მეზობელი, საქართველოს მორალური ვალდებულება აკისრია თავისი ისტორიული როლი შეინარჩუნოს აზერბაიჯანელი დისიდენტების მიღების კუთხით.

მკაფიო მესიჯი უნდა გაჟღერდეს, რომ მეზობელი ქვეყნის უკანონო ქმედებები საქართველოს ტერიტორიაზე მიუღებელი იქნება და რომ ნებისმიერი სახელმწიფო მოხელე, რომელიც ჩართულია საერთაშორისო სამართლის უხეშ დარღვევაში, პასუხს აგებს ჩადენილზე", - წერია პრემიერმინისტრისადმი გაგზავნილ მიმართვაში.

წერილის დასკვნით ნაწილში კი პრესის თავისუფლებისა და ადამიანის უფლებების დაცვის ორგანიზაციები ხაზგასმით აღნიშნავენ, რომ საქართველოს ერთგულება ადამიანის ფუნდამენტალური უფლებების დაცვისადმი, რისკის ქვეშ დგას. 

წერილს ხელს შემდეგ ორგანიზაციები აწერენ: 

Canadian Journalists for Free Expression
CEE Bankwatch Network
Civil Rights Defenders
Committee to Protect Journalists
Crude Accountability
English PEN
FIDH, within the framework of the Observatory for the Protection of Human Rights Defenders
Freedom Now
Human Rights First
Human Rights House Foundation
Human Rights Watch
Index on Censorship
IFEX
International Media Support
International Partnership for Human Rights
Institute for War and Peace Reporting
Netherlands Helsinki Committee
Norwegian Helsinki Committee
PEN America
PEN International
People in Need
Reporters Without Borders (RSF)
World Organisation Against Torture (OMCT), within the framework of the Observatory for the Protection of Human Rights Defenders

აზერბაიჯანელი აქტივისტი და ჟურნალისტი აფგან მუხტარლი, მისი ოჯახის წევრების თქმით, თბილისიდან 29 მაისს გაუჩინარდა. აფგან მუხტარლის საქმე იხილეთ ამ ლინკზე.