მაჟორიტარული სისტემის გაუქმებაზე უმრავლესობაში განსხვავებულ პოზიციებს აფიქსირებენ

მაჟორიტარული სისტემის გაუქმებასთან დაკავშირებით უმრავლესობაში აზრთა სხვადასხაობაა. საპარლამენტო უმრავლესობა დარწმუნებულია, რომ მაჟორიტარული სისტემის გაუქმების საკითხი მხარდაჭერილი იქნება. უმრავლესობის დეპუტატი დავით მათიკაშვილი ფიქრობს, რომ საერთო ჯამში შეთანხმება მაინც მოხდება და ინიციატივას მხარდაჭერა აუცილებლად ექნება. საპარლამენტო უმრავლესობის წევრი ამბობს, რომ ამ დრომდე მიმდინარეობს კონსულტაციები იმ დეპუტატებთან, რომლებიც პროპორციულ სისტემას ეწინააღმდეგებიან.

,,განსაკუთრებული არაფერი ხდება. კონკრეტული დეპუტატების ცალკეული ინიციატივა საინტერესო და მნიშვნელოვანია, მაგრამ არ მგონია საბოლოო ჯამში რაიმე სახით მოხდეს გუნდურობის პრინციპის დარღვევა. არ მგონია რომელიმე დეპუტატისთვის მართლა გასახარებელი და მისაღები იყოს რამე სახით გუნდის ინიციატივის განხორციელაბას საფრთხე შეექმნას. ეს მიუღებელიც არის და ნაკლებად მგონია, რომ ასეთი რამე მოხდეს. საერთო ჯამში შეთანხმება მაინც მოხდება და შესაბამისი მხარდაჭერა აუცილებლად ექნება ამ ინიციატივას. გამოვრიცხავ იმას, რომ ცალკეული დეპუტატების ინიციატივის გამო რამე საფრთხე შეექმნას კონსტიტუციის პროექტს“- განაცხადა მათიკაშვილმა.

უმრავლესობის დეპუტატი ვიქტორ ჯაფარიძე კი კატეგორიულად ეწინააღმდეგება პროპორციულ სისტემაზე გადასვლას. ,,საკითხის ჩავარდნა რა თქმა უნდა არ გამიხარდება, თუმცა მაჟორიტარული სისტემა არ უნდა გაუქმდეს. ჩემი ბერკეტია პულტი და ხმის მიცემა. მე ჯერ ჩემი პოზიცია მაქვს და ამის ერთგული ვრჩები ჯერჯერობით. მიმდინარეობს კონსულტაციები და მოუმზადებელი არ გავა ეს პროექტი, არ მჯერა. თუ ვინმე ამას მოუმზადებელს გაიტანს, ეს მისი პრობლემა იქნება და თვითონ აიღოს პასუხისმგებლობა. მე მგონია რომ მაჟორიტარული სისტემა დარჩება," - განმარტა ჯაფარიძემ.

დღეს გავრცელდა ინფორმაცია, რომ საპარლამენტო უმრავლესობის მაჟორიტარი დეპუტატები მაჟორიტარული სისტემის გაუქმებასთან დაკავშირებით საკონსტიტუციო ცვლილებებს ჩააგდებენ. როგორც "იმედს" საპარლამენტო კულუარებში განუცხადეს, გადაწყვეტილება მარტივი მისაღები არ იყო, თუმცა სისტემის გაუქმების დადებით მხარეებში პროპორციული სისტემის მომხრეებმა ისინი ვერ დაარწმუნეს.

საპარლამენტო უმრავლესობის ლიდერმა არჩილ თალაკვაძემ გუშინ განაცხადა, რომ შეიძლება მაჟორიტარული საარჩევნო სისტემა არა 2020 წლის არჩევნებისთვის, არამედ 2024 წელს შეიცვალოს. საკონსტიტუციო ცვლილებების მიხედვით საქართველოში მაჟორიტარული სისტემა უქმდება და პროპორციულ საარცევნო სისტემაზე გადადის.

ვიქტორ ჯაფარიძე