სოზარ სუბარი: „ნაციონალური მოძრაობის“ მმართველობის მახასიათებელი ხალხისთვის ღირსების წართმევა იყო

ხალხს წაართვეს ღირსება, ეს იყო „ნაციონალური მოძრაობის“ მმართველობის მახასიათებელი, - ამის შესახებ „ქართული ოცნების“ სამგორის საარჩევნო ოლქის მაჟორიტარობის კანდიდატმა, სოზარ სუბარმა „დღის ქრონიკაში“ „ნაციონალური მოძრაობის“ მმართველობის პერიოდზე საუბრისას განაცხადა.

მისი თქმით, „ქართულმა ოცნებამ“ ადამიანებს წართმეული ღირსება დაუბრუნა.

„„ნაციონალური მოძრაობის“ ხელისუფლებაში ყოფნის დროს იყო წამება ციხეებში, პოლიციაში, სასამართლოს არარსებობა, რაზეც მეტყველებს ერთი გამამართლებელი განაჩენი წლის განმავლობაში, ადამიანები ავადმყოფობის გამო სახლებს ყიდდნენ, ოპერაცია არ ფინანსდებოდა. ეს დეტალებია, ამ ყველაფერს თავი რომ მოვუყაროთ და ერთ სიტყვაში მოვაქციოთ, ეს იყო სრული უუფლებობა ადამიანებისთვის და წართმეული ღირსება. სწორედ ეს ღირსება დაიბრუნა ქართველმა ხალხმა.

დღესაც არის უამრავი გაჭირვებული, შეიძლება დღესაც სადღაც ძალაუფლების გადამეტებას ჰქონდეს ადგილი, ასეთი ცალკეული გადაცდომები მსოფლიოს ნებისმიერ ქვეყანაში არსებობს, თუმცა მთლიანობაში, დღეს საქართველო, მსოფლიოს დემოკრატიულ ქვეყნებს შორის ერთ-ერთი ყველაზე მაღალი დემოკრატიის მქონე ქვეყანაა და ეს ყველა საერთაშორისო რეიტინგში ჩანს. ადამიანებმა დაიბრუნეს ღირსება, ეს არის მთავარი, რაც „ქართულმა ოცნებამ“ მოიტანა“, - აცხადებს სოზარ სუბარი.

„ქართული ოცნების“ ხელისუფლებაში მოსვლიდან 8 წელი გავიდა.