მამუკა მდინარაძე: ჩვენს მეგობარ ქვეყანას, აზერბაიჯანს, მეგობრულად ველაპარაკებით და საზღვრების დადგენის საკითხშიც ასევე გაგრძელდება

„ჩვენ დარწმუნებული ვართ, რომ აზერბაიჯანთან ურთიერთობისას საზღვრის საკითხს მეგობრულად გადავწყვეტთ. არანაირი სხვა ტენდენცია, გარანტიას გაძლევს, არც ერთი სხვაგვარი პოზიცია, ჩვენგან, ჩვენი ხელისუფლებიდან, არასდროს არ წავა. „ქართული ოცნების“ ხელისუფლება არის ის ხელისუფლება, რომელსაც ომი არ ჰქონია და არც ექნება მსგავსი დაძაბულობები, მითუმეტეს მეგობრებთან“, - განაცხადა პარლამენტის თავმჯდომარის მოადგილემ და საპარლამენტო უმრავლესობის ლიდერმა მამუკა მდინარაძემ „რუსთავი 2“-ის ეთერში.

მისივე თქმით, საქართველოს აზერბაიჯანთან საპრეტენზიო არაფერი გვაქვს.

„ჩვენ მეგობრობის ჩარჩოს, კამათის დონეზეც კი, არ გავცდებით. ოფიციალური სტრუქტურები ამას უზრუნველყოფენ და ეს ურთიერთობა დარჩება ისეთივე, როგორიც არის“, - აღნიშნა მამუკა მდინარაძემ.

პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.