ანრი ოხანაშვილი დავით გარეჯის საკითხზე: ჩვენ მხოლოდ კეთილმეზობლურად, სტრატეგიული პარტნიორობის ფარგლებში განვიხილავთ ამ საკითხს

არათუ პოლიტიზირებას ახდენენ, აქეთ გვედავებიან, როგორ გაბედეს ხელისუფლებამ და პროკურატურამ და როგორ დასვეს საკითხი, რომ უნდა დაიცვან ეროვნული ინტერესი, - ამის შესახებ ჯურნალისტებს საპარლამენტო უმრავლესობის წევრმა, ანრი ოხანაშვილმა დავით გარეჯის საკითხზე საუბრისა განაცხადა.

მისივე თქმით, ამ თემით სპეკულირება დაუშვებელია, მით უმეტეს იმ რთულ ფონზე, რაც მეზობელ სახელმწიფოებში ხდება.

„წარმოუდგენელი რამ ხდება, საკუთარი სამშობლოს და ეროვნული ინტერესების დაცვაზე, რომ პოლიტიკური ჯგუფები გვედავებიან, რაში უნდა ეწეროს ეს, ვერ ვხვდები! არათუ პოლიტიზირებას ახდენენ, აქეთ ხდება შედავება, როგორ გაბედეს ხელისუფლებამ და პროკურატურამ და როგორ დასვეს საკითხი, რომ უნდა დაიცვან ეროვნული ინტერესი. წარმოუდგენელია, რომ ასე არ გაინტერესებდეს საკუთარი ქვეყნისა და ტერიტორიის ბედი, ან თუ გაინტერესებს და განზრახ აკეთებ, ეს კიდევ უარესი. ასე რომ, იქნებ მოეგოს ეს ხალხი გონს და მიხვდნენ, რა განცხადებებს აკეთებენ.

ამ თემით სპეკულირება დაუშვებელია, მით უმეტეს იმ რთულ ფონზე, რაც მეზობელ სახელმწიფოებში ხდება. ჩვენ ყველაფერს ვაკეთებთ და ყველაფერს გავაკეთებთ, რომ ეს საკითხი პოლიტიკურ ჭრილში არ გადავზარდოთ - ჩვენ არაფერი გვაქვს შესადავებელი აზერბაიჯანის მხარესთან, მათ პოლიტიკურ ხელმძღვანელობასთან. პირიქით, შეხვედრის ფარგლებში, რომელიც ჩვენსა და აზერბაიჯანის საგარეო საქმეთა მინისტრებს შორის გაიმართა, მოხდა დიპლომატიურ ენაზე შეთანხმება, კონკრეტული ინფორმაციისა და მასალის გადაცემა. ეს ნიშნავს იმას, რომ ჩვენ მხოლოდ კეთილმეზობლურად, მხოლოდ სტრატეგიული პარტნიორობის ფარგლებში განვიხილავთ ამ საკითხს ისე, რომ ჩვენს მეგობრობას, მჭიდრო თანამშრომლობას არანაირი საფრთხე არ დაემუქროს”, - განაცხადა ანრი ოხანაშვილმა.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა. 8 ოქტომბერს მათ ბრალი ოფიციალურად წარედგინათ.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.