სერგი კაპანაძე ნოღაიდელის წერილზე: ის პროპაგანდა, რომ ამ წერილში წერია, რომ დავით გარეჯი არის აზერბაიჯანის, არის უბრალოდ არასწორი

ის პროპაგანდა, რომ ამ წერილში წერია, რომ დავით გარეჯი არის აზერბაიჯანის, არის უბრალოდ არასწორი, - ამის შესახებ „ევროპული საქართველოს“ წევრმა სერგი კაპანაძემ ყოფილი პრემიერ-მინისტრის, ზურაბ ნოღაიდელის მიერ აზერბაიჯანელი კოლეგისთვის გაგზავნილ წერილზე საუბრისას აღნიშნა.

„მარტივად შეგიძლიათ წერილი გაშალოთ. იქ წერია, რომ აზერბაიჯანის ტერიტორიაზე არის დავით გარეჯის კომპლექსის ძეგლების ნაწილი, რომელიც საჭიროებს რესტავრაციას . ასე არის ეს და რა ვქნათ?“ - აცხადებს კაპანაძე.

სოციალურ ქსელში გასაჯაროებული დოკუმენტით გახდა ცნობილი, რომ ყოფილი პრემიერი აზერბაიჯანელ კოლეგისთვის გაგზავნილ წერილში დავით გარეჯს აზერბაიჯანის ტერიტორიაზე მდებარე ძეგლად მოიხსენიებს, რომელსაც რესტავრაცია სჭირდება.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.