ირაკლი კობახიძე „მთავარ არხს“: თქვენი არხის დირექტორი ყოფილი გენპროკურორის მოადგილეა და უნდა ერკვეოდეს, რისი უფლება აქვს მედიასაშუალებას და რისი - არა

გუშინ მედიაში და მათ შორის „გლავკანალში“ რაც ხდებოდა, ძალიან მძიმე იყო, - ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ გუშინ ზუგდიდში ჩატარებულ სპეცოპერაციაზე საუბრისას ბრიფინგზე განაცხადა.

„დღესაც გაგრძელდა ეს ყველაფერი და ესეც იყო ძალიან მძიმე, დღევანდელი „გლავკანალის“ ქმედებებიც სისხლის სამართლის დანაშაულის ნიშნებს შეიცავდა. ნიკა გვარამია არის ყოფილი გენპროკურორის მოადგილე და უნდა ერკვეოდეს იმაში, რისი უფლება აქვს მედიასაშუალებას და რისი - არა, რა არის დანაშაული და რა - არა. ეს მან ძალიან კარგად იცის, მაგრამ გუშინ და დღესაც მან სხვაგვარი ქმედებები განახორციელა“, - აღნიშნა ირაკლი კობახიძემ.

ზუგდიდის ცენტრში, გამსახურდიას ქუჩაზე მდებარე „საქართველოს ბანკში“ შეიარაღებულმა პირმა მძევლები 21 ოქტომბერს აიყვანა. მომხდარ ფაქტზე გამოძიება სისხლის სამართლის კოდექსის 179-ე, 236-ე და 144-ე მუხლებით დაიწყო.

თავდამსხმელი შენობიდან 3 მძევალთან ერთად გამოვიდა. როგორც კადრებში გამოჩნდა, მას შენობის დატოვების დროს ერთი ხელი აწეული ჰქონდა და სავარაუდოდ ხელში ხელყუმბარა ეკავა.

22 ოქტომბერს, გამთენიისას შსს-მ გაავრცელა განცხადება, რომლის თანახმად, ავთანდილ გალდავას უშუალო ძალისხმევით შეიარაღებული დამნაშავისგან ყველა მძევალი გათავისუფლდა და მათ სიცოცხლეს და ჯანმრთელობას საფრთხე არ ემუქრება. ხოლო დამნაშავის დაკავების მიზნით სამართალდამცველები ინტენსიურ რეჟიმში აგრძელებენ ოპერატიულ-საგამოძიებო და სამძებრო ღონისძიებებს.