ირაკლი სესიაშვილი: ყველა ღირსეული ქართველისთვის სასიხარულო უნდა იყოს, რომ დავით გარეჯის რუკა ნაპოვნია

ყველა ღირსეული ქართველისთვის სასიხარულო უნდა იყოს, რომ დავით გარეჯის რუკა ნაპოვნია, - ამის შესახებ თავდაცვისა და უშიშროების კომიტეტის თავმჯდომარემ, ირაკლი სესიაშვილმა „პოზიციაში“ განაცხადა.

გარეჯის თემაზე საუბრისას, ირაკლი სესიაშვილმა „ნაციონალური მოძრაობის“ წარმომადგენლები „კაცთმოძულეებად“ მოიხსენია და აღნიშნა, რომ მმართველმა ძალამ აღნიშნულ პოლიტიკურ ძალას არა მხოლოდ ხელისუფლება ჩამოართვა, არამედ - ის ძალაუფლებაც, რომლითაც ქვეყანას „ისტორიულად ამახინჯებდნენ“.

„დღეს გაახსენდათ, რომ გარეჯი საქართველოა და ამბობენ, კი, გარეჯი საქართველოაო, თორემ მანამდე სხვანაირად ჭიკჭიკებდნენ. წინასწარი შეთანხმება რაც იყო და ახლა ნოღაიდელმა უშიშროების საბჭოს თემის გახსენებით დაადასტურა ეს. წინასწარი შეთანხმება ნიშნავს, რომ ჩვენ რაღაცაზე ვთანხმდებით და შემდეგ ეს შეთანხმება აისახება ხელმოწერაში. 2012 წლიდან ამ კაცთმოძულეებს მარტო ხელისუფლება კი არ გამოვტაცეთ ხელიდან, ჩვენ მათ გამოვტაცეთ ის ძალაუფლება, რომლითაც ისტორიულად დაამახინჯებდნენ ჩვენს ქვეყანას. დარწმუნებული ვარ, ეს წინასწარი შეთანხმება მოვიდოდა სისრულეში. ალბათ, 2008 წლის აგვისტოს ომმა შეუშალა მათ ხელი და ვერ მიიყვანეს ბოლომდე, თორემ ამ ტერიტორიას ჩამოაჭრიდნენ საქართველოს. მერე როგორც დარჩიაშვილი, ან კალანდაძე ან სხვები გვიმტკიცებდნენ, იტყოდნენ, რომ არ არის ჩვენი და კომუნისტებმა დაგვღუპესო. ეს ის ძალაა, რომლისთვისაც ეროვნული განცდა უცხოა. პასუხისმგებლობა გაქვს არა შენი პარტიის, ან თუნდაც ხელისუფლების მიმართ, არამედ პასუხისმგებლობა გაგაჩნია შენი წინაპრების მიმართ, რომლებმაც სიცოცხლე გაიღეს, რომ ჩვენი მიწა და სიწმინდეები დაეცვათ და შთამომავლობისთვის გადაეცათ. ესენი კიდევ ამბობენ, კომუნისტების დროს ასე იყოო, ასე არ იყო და რომც ყოფილიყო, იქაც მთელი ენერგია უნდა ჩაედოთ, 3500 ჰექტარზეა საუბარი“, - განაცხადა ირაკლი სესიაშვილმა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.