გიორგი ვაშაძე თეა წულუკიანის განცხადებაზე: ჩვენ ვთანამშრომლობთ ამ ორგანიზაციებთან, რომ თითოეული ადამიანის ხმა დავიცვათ

დიახ, ჩვენ ვთანამშრომლობთ ამ ორგანიზაციებთან, ძალიან მარტივი მიზეზისთვის, რომ თითოეული ადამიანის ხმა დავიცვათ, - ასე გამოეხმაურა „სტრატეგია აღმაშენებლის“ ლიდერი, გიორგი ვაშაძე „ქართული ოცნების“ წარმომადგენელის, თეა წულუკიანის განცხადებას იმის შესახებ, რომ 129 სადამკვირვებლო ორგანიზაციიდან 32 პირდაპირ ან ირიბად დაკავშირებულია ოპოზიციურ პარტიებთან.

მისი თქმით, მათი ინტერესია, რაც შეიძლება მეტი დამკვირვებელი იყოს მობილიზებული საარჩევნო უბანზე.

„დიახ, ჩვენ ვთანამშრომლობთ ამ ორგანიზაციებთან, ძალიან მარტივი მიზეზისთვის, რომ თითოეული ადამიანის ხმა დავიცვათ და რაც შეიძლება მეტი დამკვირვებელი იყოს მობილიზებული საარჩევნო უბანზე. ამას არ კრძალავს კანონი და ეს არის ჩვენი უფლება.

საქართველო არის ერთადერთი ქვეყანა, სადაც კომისიის წევრების ორ მესამედს, 12 წევრიდან ცხრა წევრს აკონტროლებს „ქართული ოცნება“. შესაბამისად, ამას ჩვენ ვუპირისპირებთ იმ კანონის შესაბამის მოქმედებას, რომელიც სჭირდება არჩევნებში გამარჯვებას.

ვაფრთხილებ წულუკიანს, ივანიშვილს, გახარიას, კობახიძეს და აბსოლუტურად ყველას, ხელი არ წაგიცდეთ არჩევნების გასაყალბებლად, თორემ ხელებს დაგამტვრევთ. არ მოგცემთ არც ერთი ხმის გაყალბების შესაძლებლობას“, - განაცხადა გიორგი ვაშაძემ.

თეა წულუკიანმა განაცხადა, რომ არჩევნებზე დამკვირვებლად დარეგისტრირებული 129 ორგანიზაციიდან 32 პირდაპირ დაკავშირებულია, ან ამა თუ იმ ფორმით აფილირებული ოპოზიციასთან.