კახა კალაძე: „ქართული ოცნება“ დამაჯერებელი გამარჯვებისთვის ემზადება

„ქართული ოცნება“ ერთადერთი ძალაა, რომელსაც შეუძლია ხალხისა და ქვეყნის წინაშე არსებულ პრობლემებსა და გამოწვევებს წარმატებით უპასუხოს“, - ამის შესახებ დედაქალაქის მერმა ისნის მაჟორიტარობის კანდიდატად კახა კახიშვილის წარდგენისას განაცხადა.

კახა კალაძემ აღნიშნა, რომ „ქართულმა ოცნებამ“ წინა არჩევნებზე დაადასტურა, რომ ერთადერთი ძალაა, რომელსაც შეუძლია შეინარჩუნოს მშვიდობა, სტაბილურობა და სასიცოცხლოდ მნიშვნელოვანი რეფორმები განახორციელოს.

„ჩვენ განვახორციელეთ მნიშვნელოვანი რეფორმები, ყველას კარგად გვახსოვს, რა მდგომარეობა იყო ჯანდაცვის სექტორში, თუმცა რეფორმის შედეგად მივიღეთ ის, რომ ჯანდაცვა დღეს საქართველოში ყველასთვის არის ხელმისაწვდომი. უამრავი ოპერაცია დაფინანსდა, ათიათასობით გადარჩენილი სიცოცხლე - უნდა აღვნიშნო ცე ჰეპატიტის ელიმინაციის პროგრამა, რომლის დახმარებითაც უამრავ ადამიანს მოუგვარდა ჯანმრთელობის პრობლემა“, - აღნიშნა კახა კალაძემ.

რაც შეეხება სოფლის მეურნეობის მიმართულებას, „ქართული ოცნების“ გენერალურმა მდივანმა აღნიშნა, რომ მნიშვნელოვანი იყო მცირე და საშუალო ბიზნესის განვითარებისთვის არსებული პროგრამები, რომლითაც ბევრმა მოქალაქემ ისარგებლა და ის ხელს უწყობდა სამუშაო ადგილების შექმნას.

განათლების მიმართულებით კი, კახა კალაძემ ხაზი გაუსვა იმას, რომ ეს სამომავლოდ პრიორიტეტია, რათა ხელი შევუწყოთ მომავალ თაობებს; რომ მათი განათლება ჩვენი ქვეყნის საკეთილდღეოდ გამოვიყენოთ.

თბილისის მერმა ქალაქში განხორციელებულ პროექტებზეც გაამახვილა ყურადღება და აღნიშნა, რომ ცენტრალური ხელისუფლების მხარდაჭერის გარეშე ამხელა რესურსების მობილიზება შეუძლებელი იქნებოდა.

საქართველოში არჩევნები ხვალ გაიმართება.