თეა წულუკიანი: „ქართული ოცნება“ მშვიდად, წყნარად იგებს ამ არჩევნებს, ბოროტი ძალები კი ცდილობენ იარაღით ირბინონ და ხალხი შეაშინონ

ის, რომ წლევანდელ არჩევენებზე არის ასეთი დიდი აქტივობა, ჩვენ რა თქმა უნდა, ვუკავშირებთ იმას, რომ ამომრჩევლების ძალიან დიდ რაოდენობას, რომლებიც არიან „ქართული ოცნების“ მომხრეები, უბრალოდ არ სურთ იმ ძალის დაბრუნება ხელისუფლებაში, რომელიც ჩვენთვის ყველაზე ტრაგიკული მარცხის, 2008 წლის აგვისტოში ფეიკ გამარჯვებას ზეიმობდა და იმ ძალის, რომელიც დღეს, დილის 10 საათზე ზეიმობდა ავღანეთში „ნაციონალური მოძრაობის“ ფეიკ გამარჯვებას, - ამის შესახებ „ქართული ოცნების“ პარტიული სიის მეოთხე ნომერმა, თეა წულუკიანმა ბრიფინგზე განაცხადა.

მისი განმარტებით, ავღანეთში კენჭისყრის პროცესი ამ წუთებშიც კი მიმდინარეობს.

„ჩვენი ამომრჩევლების უმრავლესობას არ სურს, რომ ეს ძალები დაბრუნდნენ ხელისუფლებაში და ქვეყანა დააყენონ ისევ რეგრესისა და ბორიტების გზაზე. მე ამას ვუკავშირებ ჩემს გუნდთან ერთად აქტივობას, რისთვისაც ამომრჩევლებს კიდევ ერთხელ მინდა ვუთხრა მადლობა. რაც მოგვდის პარტიული დანაყოფებიდან ინფორმაცია, „ქართული ოცნება“ მშვიდად, წყნარად იგებს ამ არჩევნებს, ბოროტი ძალები კი ცდილობენ იარაღით ირბინონ, ხალხი შეაშინონ და 8 საათზე შეიკრიბონ, რომ ადრე უზეიმიათ, რაღაც ტიპის ფეიკ გამარჯვება იზეიმონ“, - განაცხადა თეა წულუკიანმა.

საქართველოში საპარლამენტო არჩევნები მიმდინარეობს. ამომრჩეველმა არჩევანი დღეს 50 საარჩევნო სუბიექტს - ორ ბლოკსა და 48 პარტიას შორის უნდა გააკეთოს.საპარლამენტო არჩევნებისთვის 38 ქვეყანაში 52 საარჩევნო უბანი გაიხსნა.2020 წლის 31 ოქტომბრის არჩევნებისთვის კოვიდდაწესებულებებში 127 საარჩევნო უბანი მუშაობს.პენიტენციურ დაწესებულებებში კი 10 საარჩევნო უბანი გაიხსნა. არჩევნებს 132 ადგილობრივი და 23 საერთაშორისო ორგანიზაციის წარმომადგენელი აკვირდება. ამასთან, ამერიკული ორგანიზაცია Public Opinion Strategies „იმედის“ დაკვეთით ეგზიტპოლს ატარებს.