ირაკლი კობახიძე: ჩვენ, ქართველ ხალხსა და საერთაშორისო პარტნიორებს გვაქვს სხვა ინტერესი, ესაა ჩვენი ქვეყნის შემდგომი დემოკრატიული განვითარება

გაიმარჯვებს სწორი გზა და ეს გზა არის ის, რომელსაც ჩვენ გვთავაზობდნენ საერთაშორისო პარტნიორები. ეს არის მრავალპარტიული პარლამენტი, რომელიც აუცილებლად შედგება, როდესაც გაიმართება პარლამენტის პირველი შეკრება. ეს მოხდება დეკემბრის პირველ რიცხვებში, როგორც ეს კანონმდებლობითაა გათვალისწინებული, - ამის შესახებ პარტია „ქართული ოცნების“ აღმასრულებელმა მდივანმა, ირაკლი კობახიძემ პარტიის ოფისში გამართულ ბრიფინგზე განაცხადა, რომელიც ბოიკოტთან დაკავშირებით პარტიების მიერ გაკეთებულ განცხადებებს გამოეხმაურა.

კობახიძე დარწმუნებულია, რომ პროცესები ქვეყანაში ძლიან მშვიდად წარიმართება.

უახლოეს დღეეში გამოიკვეთება ის, რომ ყველაფერი იქნება მშვიდად და ჩვენი ქვეყანა გააგრძელებს განვითარებას ისე, როგორც უნდა ქართველ ხალხსა და საერთაშორისო პარტიორებს“, - განაცხადა კობახიძემ.

მან კიდევ ერთხელ გაამახვილა ყურაადღება, თუ რას ნიშნავს მრავალპარტიული პარლამენტი, რომელიც ახალი საარჩევნო სისტემით საქართველოში დამკვიდრდა.

„ამ საარჩევნო სისტემის საფუძველზე ახალ პარლამენტში 9 პოლიტიკური პარტია შედის. ჩვენ მოვიკელით მანდატები, იმისათვის, რომ პარლამენტში 9 პოლიტიკური პარტია შესულიყო. საქართველოში ყოველთვის პრობლემას ჭარბი უმრავლესობა წარმოადგენდა და ახალ პარლამენტში ამის აუცილებლობა აღარ არსებობს. ანუ, „ქართული ოცნება“ მიიღებს არა უმეტეს 90 მანდატს და დამატებით მანდატებს მიიღებს კიდევ 8 პოლიტიკური პარტია. ეს არის ფუნდამენტური მიღწევა, რომელიც ჩვენი საერთაშორისო პარტნიორების ძალისხმევით შედეგად დადგა. სწორედ ამ მიღწევას უტევენ ახლა ოპოზიციური პარტიები. თქვენ როგორ წარმოგიდგენიათ, რომ ახლა ეს შეტევა იყოს წარმატებული?! ბუნებრივია, ვერ იქნება, გამომდინარე იქედან, რომ ჩვენ, ქართველ ხალხსა და საერთაშორისო პარტნიორებს გვაქვს სხვა ინტერესი. ეს არის ჩვენი ქვეყნის შემდგომი დემოკრატიული განვითარების ინტერესი. ზუსტად ამის საწინააღმდეგო ინტერესი აქვს ბუნებრივია, ოპოზიციას. გაიმარჯვებს სწორი გზა და ეს გზა არის ის, რომელსაც ჩვენ გვთავაზობდნენ საერთაშორისო პარტნიორები. ეს არის მრავალპარტიული პარლამენტი, რომელიც აუცილებლად შედგება, როდესაც გაიმართება პარლამენტის პირველი შეკრება. ეს მოხდება დეკემბრის პირველ რიცხვებში, როგორც ეს კანონმდებლობითაა გათვალისწინებული“, - განაცხადა ირაკლი კობახიძემ.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,15 %; „ნაციონალური მოძრაობა - გაერთიანებული ოპოზიცია“ - 27,14%; „ევროპული საქართველო“ - 3.78%; „ლელო“ – 3,15%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ. საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

ამასთან, მანდატებზე უარი უკვე ოფიციალურად თქვეს „პატრიოტთა ალიანსმა“, „ევროპულმა საქართველომ“, „ლეიბორისტულმა პარტიამ“,„ლელომ“ და „ნაციონალურმა მოძრაობამ“.