სააკაშვილის თქმით, კორონავირუსი რამდენიმე კვირის წინ გადაიტანა და მოქალაქეებს ოპოზიციის აქციაზე მისვლის არ უნდა ეშინოდეთ

საქართველოს ექსპრეზიდენტი მიხეილ სააკაშვილი აცხადებს, რომ მას კორონავირუსის ინფექცია გადატანილი აქვს, თუმცა, უსიმპტომოდ და ეს ანტისხეულების ტესტის გაკეთების შემდეგ გაიგო.

როგორც მან „ტვ პირველის“ ეთერში განაცხადა, 8 ნოემბერს დაგეგმილ აქციაზე მთავარია საზოგადოების კონსოლიდაცია და მოქალაქეებს არაფრის უნდა შეეშინდეთ, მათ შორის არც ვირუსის.

„მთავარია საზოგადოების ფართო კონსოლიდაცია. არაფრის არ უნდა შეგვეშინდეს, დაავადებებია, რაღაცებია, მე თვითონ გადავიტანე ეს ვირუსი რამდენიმე კვირის წინ, მსუბუქ გრიპზე უფრო მსუბუქად გადავიტანე. ბევრი ადამიანი ამბობს ამას. რა თქმა უნდა, ფრთხილად უნდა ვიყოთ. ვიყავი ინფიცირებული და თითქმის არც გამიგია, მერე ამომიგდო ანტისხეულებზე. არ უნდა გვეშინოდეს, ფრთხილად უნდა ვიყოთ, ნიღაბი უნდა ვატაროთ, ხელები უნდა დავიბანოთ. ჩემ გარშემო უამრავმა ადამიანმა გადაიტანა და თითქმის არავის არანაირი გართულება არ ჰქონია. აი, ქვეყნის დაკარგვა კი მართლა მომაკვდინებელია და თითოეული ჩვენგანის არსებობის დასრულება შეიძლება იყოს“, - განაცხადა მიხეილ სააკაშვილმა.

იმის ფონზე, რომ ბოლო 24 საათში საქართველოში კოვიდინფიცირების ახალი 2295 შემთხვევა გამოვლინდა, საქართველოს მესამე პრეზიდენტი თავის მხარდამჭერებს მოუწოდებს, რომ აქციაზე გავიდნენ. სააკაშვილისთვის აქციის მასშტაბურობა, უფრო მნიშვნელოვანია რასაც ადასტურებს მისი მცდელობა მოქალაქეები დაარწმუნოს, რომ კორონავირუსი საფრთხის შემცველი არ არის და პანდემიას არ შეუშინდნენ. „ნაციონალური მოძრაობის“ წევრები ამბობენ, რომ მთავარია უსაფრთხოების წესების დაცვა და ამ შემთხვევაში ვირუსის გავრცელება არ მოხდება - თუმცა ახლა კორონავირუსს აქციაზე წესების დაცვით მყოფი სალომე სამადაშვილი ებრძვის.

„ქართული ოცნების“ წევრები ამბობენ რომ მიხეილ სააკაშვილი პანდემიასთან ბრძოლის დროს - კორონას მხარეს აღმოჩნდა. მათი თქმით სააკაშვილი ყოველთვის უგუნური ბოროტებით გამოირჩევა, რაც ამ შემთხვევაში ადამიანების ჯანმრთელობის უგულებელყოფით გამოიხატება.