ირაკლი კობახიძე: წყლის ჭავლის გამოყენება იყო ყველაზე რბილი ფორმა, რასაც ვითარების განმუხტვა შეეძლო

წყლის ჭავლი რომ არ გამოყენებინათ, დამერწმუნეთ, უფრო მეტი ადამიანი დაშავდებოდა როგორც ერთ, ისე მეორე მხარეს, - ამის შესახებ პარტია „ქართული ოცნების“ აღმასრულებელმა მდივანმა ირაკლი კობახიძემ ეუთო/ოდირის საერთაშორისო სადამკვირვებლო მისიასთან მორიგი სამუშაო შეხვედრის დასრულების შემდეგ 8 ნოემბერს ცესკო-სთან განვითარებულ მოვლენებზე საუბრისას ჟურნალისტებს განუცხადა.

„იყო ადამიანების ის საკმარისი რაოდენობა, რომელთაც შეეძლოთ ღობე შეენგრიათ, შედეგმა მიიღო კანონსაწინააღმდეგო ხასიათი და აქედან გამომდინარე, წყლის ჭავლის გამოყენება იყო ყველაზე რბილი ფორმა, რომელსაც შეეძლო ვითარების განმუხტვა. წყლის ჭავლის რომ არ გამოეყენებინათ, დამერწმუნეთ, უფრო მეტი ადამიანი დაშავდებოდა როგორც ერთ, ისე მორე მხარეს“, - განაცხადა ირაკლი კობახიძემ.

8 ნოემბერს ოპოზიციური პარტიების წარმომადგენლებმა პარლამენტთან საპროტესტო აქცია გამართეს და თავიანთი მოთხოვნები გააჟღერეს. მათ შორის არის: 31 ოქტომბრის არჩევნების შედეგების არალეგიტიმურად ცნობა, რიგგარეშე არჩევნების ჩატარება და ცენტრალური საარჩევნო კომისიის ხელახალი დაკომპლექტება. მოგვიანებით მათ ცესკოსთან გადაინაცვლეს.

ცესკოსთან სამართალდამცველებმა დემონსტრანტების მიმართ წყლის ჭავლი ორჯერ გამოიყენეს. ამას წინ უძღოდა დაპირისპირება და აგრესია პოლიციელების მიმართ.