საქნახშირის დირექტორის თქმით, საწარმოში შენიშვნების 80% გათვალისწინებულია

„საქნახშირის“ დირექტორის, ჯამბურ ჯაყელის განცხადებით, ეკონომიკის სამინისტროსგან საწარმომ 17-პუნქტიანი შენიშვნა მიიღო, მათგან ამ დროისთვის 80% აღმოფხვრილია. ამის შესახებ ინფორმაციას 1tv.ge ავრცელებს.

 "2016 წლის მარტიდან დღემდე საწამომ გადაიარაღებისთვის 4 მილიონახევარი ლარი დახარჯა. ყველა ღონეს მივმართავთ, რათა დასაქმებულების უსაფრთხოება დაცული იყოს", - განაცხადა ჯამბურ ჯაყელმა.

ეკონომიკისა და ჯანდაცვის სამინისტროებმა ჭიათურის მაღაროებისა და ტყიბულის შახტის შემოწმება დაასრულეს. შემოწმების შემდეგ დარღვევები გამოვლინდა მინდელის შახტში, ასევე შუქრუთის, მღვიმევის, ითხვისის მაღაროებში, რის გამოც შპს “საქნახშირი“ და „ჭიათურის სამთო გამამდიდრებელი კომბინატი“ „პროდუქტის უსაფრთხოებისა და თავისუფალი მიმოქცევის კოდექსის“ შესაბამისად დააჯარიმდნენ.

„საქნახშირის (ჯი-აი-ჯი ჯგუფი)“ მინდელის შახტში გამოვლენილი დარღვევები (შეუსაბამობები) სამი სახისაა: არაარსებითი, არსებითი და კრიტიკული. 

„ჭიათურის სამთო გამამდიდრებელი კომბინატის“ მაღაროებში კრიტიკული დარღვევები არ გამოვლენილა.